Նախիջևանի ուղղությամբ Ադրբեջանի առաջ բերած դիրքը՝ 4 կողմից կրակի տակ. ԲԱՑԱՌԻԿ տեսանյութ
Ադրբեջանի կողմից առաջ բերված դիրքը 4 կողմից վերահսկում ենք, հարկ եղած դեպքում կարողանում ենք կրակի տակ պահել:Այս մասին Նախիջևանի սահմանին գտնվող առաջնագծում լրագրողների հետ զրույցում վստահեցրեց մայոր Անդրանիկ Ծատուրյանը:
Ըստ նրա` Ադրբեջանն առաջխաղացմամբ իր համար բարենպաստ պայմաններ չի ստեղծել:
«Բլրի ներքևի հատվածում են եղել, հիմա բարձրացել են բլրի վրա, որը կտրված է ապահովումից, եթե մեծ քանակի զորք էլ կուտակված ունենան, միևնույնն է, ապահովումից կտրված են: Կոնկրետ կարողանում ենք ազդել դիրքի վրա, մեր գյուղացիների համար վտանգ չեն ներկայացնում: Ոչ մի կերպ այդ տարածքը իրենց չի կարող օգուտ տալ»,- շեշտեց մայորը:
Tert.am-ի հետ զրույցում մարտական հերթապահություն իրականացնող զինծառայողները վստահեցրին, որ Ադրբեջանի ցանկացած գործողություն, սադրանք զսպել են, պատրաստ են հետագայում ևս զսպել, հակահարված տալ:
Զինծառայողներն ընդգծեցին, որ չնայած նրան, որ Ադրբեջանը սպառազինության մրցավազքի մեջ է, բայց մարդկային գործոնով շատ թույլ է, իրենք անձամբ են համոզվել՝ դիտարկելով հակառակորդի գործողությունները: Զինծառայողները հորդորեցին հասարակությանը հանգիստ լինել, Նախիջևանի ուղղության վերաբերյալ Ադրբեջանի տարածած տեղեկատվությունը դիտարկել որպես ապատեղեկատվություն:
Հիշեցնենք, որ Ադրբեջանական մամուլում պարբերաբար գրվում է, որ Նախիջանում տարածք են «ազատագրել»:
Նշենք, որ ՀՀ պաշտպանության նախարարությունն այց էր կազմակերպել Նախիջևանի սահմանին գտնվող առաջնագիծ։ Այցի շրջանակում լրագրողները հայկական և ադրբեջանական կողմերի կրակակետերը տեսնելու հնարավորություն ունեցան:
Մանրամասները` տեսանյութում
