Փայլանը եղել է Վանում. «Ուր ձեռքս տարա, մարդու ոսկոր դուրս եկավ».զուգարանի կառուցման վայրում հին հայկական գերեզմանոց է եղել
Թուրքիայի Մեջլիսի հայազգի պատգամավոր Կարո Փայլանը մեկնել է Վան ու անձամբ ծանոթացել հայկական գերեզմանոցի տարածքում իրավիճակին, որտեղ վերջերս տեղի իշխանությունները հասարակական զուգարան էին կառուցել:Թուրքիայի ընդդիմադիր Ժողովրդադեմոկրատական կուսակցության անդամ Կարո Փայլանը Վան այցելելուց հետո համոզվել է, որ զուգարանի կառուցման վայրում հին հայկական գերեզմանոց է եղել։ Այս մասին գրում է «Ակոսը»:
«Ուր ձեռքս տարա, մարդու ոսկոր դուրս եկավ: Ակնհայտ է, որ հասարակական զուգարանը, հանդերձարանն ու սրճարանը կառուցվել են գերեզմանների վրա: Ցավ ապրեցի, որ չկարողացանք անգամ մեր մահացածներին տեր կանգնել»,– ասել է Փայլանը լրատվամիջոցների ներկայացուցիչներին:
Պատգամավորը նշել է նաև, որ ծնունդով Վանից հայտնի հայ գեղանկարիչ Արշիլ Գորկու թաղամասի մոտ գտնվող աղբյուրը, որը վերակառուցվել էր 2015թ.-ին, նույնպես դադարել է գործել, իսկ քաղաքապետարանը հանել է Գորկու մասին հիշատակող բացատրական պաստառը:
