Փետրվարի 1-ից էլէներգիայի սակագինը հնարավոր է իջեցնել
Մենք ունենք ռեզերվներ փետրվարի 1-ից էլեկտրաէներգիայի սակագնի իջեցնելու մասով, և եթե հայթայթվեն այդ գումարները, 3-ից 3,5 դրամով հնարավոր է իջեցնել էլեկտրաէներգիայի սակագինը, որը 8%-ի սահմաններում 39,9 դրամ է միջին սակագնի պայմաններում: Այսօր հրավիրված ասուլիսին հայտարարեց ԱԺ-ում ՀՀ գազի և էլեկտրաէներգիայի մատակարարման և բաշխման համակարգերի գործունեությունը, գազի և էլեկտրաէներգիայի գործող սակագների հիմնավորվածությունը քննելու նպատակով ստեղծված քննիչ հանձնաժողովի նախագահ Միքայել Մելքումյանը: Ըստ նրա՝ իջեցման հիմքում դրված են այն գործողությունները, որոնք պետք է անի Էներգետիկ ենթակառուցվածքների և բնական պաշարների նախարարությունը և ՀԾԿՀ-ն, որոնք էլ պետք է բանակցեն և՛ արտադրող կայանների, և՛ բնական մենաշնորհ ունեցող ընկերության հետ, որպեսզի կարողանան ռեզերվները տեղագրեն: Իսկ մինչ այդ Մելքումյանն առանձին-առանձին անդրադարձավ այն ռեզերվներին, որտեղից կարելի է հայթայթել գումարները և նկատեց, որ իջեցման ռեզերվները պետք է փնտրել ոչ միայն ՀԷՑ-ում, այլև ամբողջ շղթան պետք է դիտարկեն, այսինքն՝ արտադրող կայանները նույնպես: Մելքումյանը նախ նշեց, որ ՀԷՑ-ը 39,9 դրամով է միջին սակագին սահմանել, իսկ միջինը արտադրող կայաններից գնում է 21,6 դրամով: «Պետք է տեսնել, թե որքանով է տրամաբանական, և դրա մեջ է շատ բան թաքնված, այսինքն՝ հիմնական ռեզերվը 21,6-ի մեջ է»,-ասաց նա և նկատեց, որ պետական սեփականություն հանդիսացող 2 կայանները՝ Ատոմակայանը և ՋԷԿ-ը, բաշխման ամբողջ ծավալի 55%-ն են կազմում: «Հարց եմ ուղղում՝ որքա՞ն է շահութաբերությունը՝ 10%, որից պետբյուջեն շահաբաժին չի ստացել, այսինքն՝ մենք պետք է ծախսերի, չասեմ, կոշտ, բայց ռեալ օպտիմալացում իրականացնենք, պետությունը լավ բիզնես չի կարողանում կառավարի»,-ասաց նա և հուշեց, որ ատոմակայանի ռեսուրսի երկարացման աշխատանքներ են իրականացվում, և հաջողվել է 25 մեգավատի լրացուցիչ ռեզերվ բացահայտել: Մելքումյանը նշեց, որ 5 դրամ իջեցնելու համար 27 մլն դրամ է անհրաժեշտ: Երկրորդ կարևոր ռեզերվներից նա համարեց Իրան-Հայաստան գազամուղից ստացված ծավալների ավելացումը, որն արդեն 515-520 միլիոն խմ մետրի է հասնում: Երրորդ ռեզերվը, ըստ նրա, ՀԷՑ-ի շահութաբերությանն է վերաբերում, որը հիմա 14% է կազմում: Մելքումյանը նշեց, որ հանձնաժողովը գտնում է, որ շահութաբերությունը պետք է 14-ից 12-ի իջեցվի: Հանձնաժողովի նախագահը նաև կարևորեց մեկ այլ ռեզերվ, որը վերաբերում է կորուստներին: Ըստ նրա՝ այսօր փաստացի սակագնի մեջ այն հաշվարկված է 11, 3 տոկոս, մինչդեռ փաստացի 9,4 % է կազմում, և 2020թ. համար հաշվարկվել է նվազեցնել և հասցնել 7,5%: «Այսինքն՝ հիմա պետք է հասնել արագ կորստի նվազմանը, որը սակագնի մեջ պետք է արտահայտվի, ինչո՞ւ պետք է փաստացի քիչ լինի, մեկ տոկոսը 2 մլրդից պակաս չի, սխալ մեթոդաբանություն է, և պետք է հետամուտ լինել խնդրին, որ արծարծվի»,-ասաց նա:
