Քոչարյանի գործն անաչառ չի քննվում.. Քոչարյանի փաստաբանները ինքնաբացարկ են պահանջում
Վերաքննիչ քրեական դատարանում երկրորդ նախագահ Ռոբերտ Քոչարյանի խափանման միջոցի հարցով բողոքի քննության նիստում այսօր քննվել է դատավորին ինքնաբացարկ հայտնելու միջնորդությունը: Քոչարյանի պաշտպանները գտնում են, որ Քոչարյանի գործով դատական նիստը ղեկավարող դատավոր Ռուբեն Մխիթարյանը պետք է ինքնաբացարկ հայտնի:Փաստաբան Հայկ Ալումյանը լրագրողների հետ զրույցում մանրամասնեց, թե ինչու են նման միջնորդությամբ հանդես եկել: Նա ասաց, որ մամուլից տեղեկացել են, որ Վերքաննիչ դատարանում վիճակահանություն է տեղի ունեցել, որի ընթացքում որոշվել է, թե որ դատավորը պետք է քննի այս գործը:
"Վիճակահանություն որպես այդպիսին օրենքով նախատեսված չէ: Մենք ուզեցինք ճշտել դատավորից՝ իրո՞ք դա այդպես է, իրո՞ք վիճակահանություն տեղի է ունեցել, թե ոչ, դատավորը հաստատեց երեկվա դատական նիստին, որ եղել է վիճակահանություն: Այդ ժամանակ մենք միջնորդեցինք, որ դատավորը ներկայացնի այդ վիճակահանություն գործողության արձանագրությունը: Դատավորը ընդմիջում հայտարարեց, հեռացավ, վերադարձավ, ասաց, որ այդպիսի արձանագրություն չկա: Նա լրացուցիչ բացատրություններ տվեց՝ դրանով էլ ավելի մեծ անորոշություն մտցնելով: Առաջարկեց մեզ այդ ամենը պարզել դատարանի նախագահի պաշտոնակատարից, ինչը փորձեցինք անել: Դատարանի նախագահի պաշտոնակատարի պատասխանից բխեց, որ վիճակահանություն իրոք եղել է, վիճակահանության արձանագրություն չկա, դրա հետ միասին գրեց, որ որոշվել է պատահականությամբ և դատավորների ծանրաբեռնվածության սկզբունքի հիման վրա: Դրանք իրար հետ հակասության մեջ են, եթե պատահականության սկզբունքով է որոշվել, ուրեմն ծանրաբեռնվածությունը չէր կարող հաշվի առնվել”,- ասաց Ալումյանը:
Նա մանրամասնեց, որ իրենք նկատի ունեն Եվրոպական կոնվենցիայի երկրորդ հոդվածի առաջին կետը, որը սահմանում է, որ յուրաքանչյուր ոք իրավունք ունի, որպեսզի իր գործը քննի օրենքի հիման վրա ստեղծված դատարանը: «Եվ մենք ցույց տվեցինք այսօր դատարանին, որ չկա այնպիսի օրենք, որը նախատեսած լիներ այն ընթացակարգը, որը տվյալ գործով կիրառվել է”,- ասաց նա:
Փաստաբանը կասկած հայտնեց, որ Քոչարյանի գործն անաչառ չի քննվում: "Թատրոնը սկսվում է կախիչից, երբ վերարկուդ հանում ու կախում ես: Եթե այս գործի քննությունը սկսվել է օրենքի կոպիտ խախտմամբ, մենք որևէ ակնկալիք չունենք, որ գործի ավարտը կարող է լինել օրինական: Դրա համար էլ մենք որոշեցինք դատավորին ինքնաբացարկի միջնորդություն ներկայացնել”,- հավելեց նա:
