Հնարավոր է՝ Մանվել Գրիգորյանի մի զանգով ստահակները զինվեն. պահանջում ենք արագացված դատավարություն
Մանվել Գրիգորյանի ազատ արձակման դեմ բողոքող քաղաքացիների ակցիան Էջմիածնից տեղափոխվել է մայրաքաղաք Երևան:Հիշեցնենք, որ ակցիաները մեկնարկեց հենց նույն պահից, երբ Գրիգորյանի նկատմամբ խափանման միջոցը փոխվեց, և նա ազատ արձակվեց 25 միլիոն դրամ գրավի դիմաց:
Ակցիայի մասնակիցները պահանջում են արագացված դատավարություն՝ խոստանալով իրենց գործողությունները շարունակել այնքան ժամանակ, քանի դեռ Գրիգորյանն ազատության մեջ է:
Ազատության հետ զրույցում ակցիայի մասնակիցներից մեկը հայտարարեց, որ Գրիգորյանը հանրության համար վտանգավոր մարդ է, և դատարանը հաշվի չի առել այդ ու մի շարք այլ հանգամանքներ: Քաղաքացին քննություն է պահանջում նաև դատավորի հանդեպ, ով ազատ է արձակել Մանվել Գրիգորյանինը:
Հավելենք, որ Դատախազությունը վերաքննիչ բողոք է ներկայացնելու Մանվել Գրիգորյանին գրավի դիմաց կալանքից ազատ արձակելու որոշման դեմ:
«Չի կարելի թույլ տալ հանրության համար վտանգավոր մարդուն գտնվել ազատության մեջ: Եթե բաց են թողնում առողջական վիճակի համար, պետք է տեղափոխեն հիվանդանոց, այլ ոչ՝ առանձնատուն: Այո, ոստիկանությունը լավ է աշխատում, բայց տիրապետում ենք, որ նա երկար տարիներ եղել է ռազմական գործիչ ու հնարավոր է՝ զենքերը մինչև վերջ չեն հայտնաբերվել, հնարավոր է՝ իր մի զանգով իր ստահակներից ոմանք զինվեն: Սա ինֆորմացիա չէ, այլ՝ մտահոգություն»,- լրագրողների հետ զրույցում ասաց Մանվել Գրիգորյանի ազատ արձակման դեմ բողոքի ակցիայի կազմակերպիչներից Ջիվան Աբրահամյանը:
