ԱՄՆ բանակում արգելք կսահմանվի տրանսգենդերների մեծամասնության ծառայության համար
ԱՄՆ պաշտպանության նախարարությունը երեքշաբթի կարգադրություն է ստորագրել, որը տրանսգենդերների մեծ մասին արգելում է ծառայել ամերիկյան ԶՈւ-ում, հայտնում է Hill պարբերականը՝ վկայակոչելով Պենտագոնի կարգադրությունը, որը ստորագրել է ԱՄՆ պաշտպանության առաջին փոխնախարար Դեւիդ Նոքրվիսթը:Պարբերականի տեղեկություններով՝ հիմա ԱՄՆ ԶՈւ ծառայության ընդունվող տրանսգենդերները ծառայելու իրավունք ունեն միայն այն սեռով, որով ծնվել են: Դրանից բացի, գերատեսչությունը յուրաքանչյուր թեկնածուին առանձին կքննի եւ իրավունք կունենա նրան մերժել ծառայության ընդունելու հարցում:
ԱՄՆ ՊՆ նոր քաղաքականությունը ուժի մեջ կմտնի ապրիլի 12-ից: Դրանից հետո «գենդերային դիսֆորիա» ախտորոշմամբ (գենդերային ինքնության խանգարում) մարդկանց թույլ կտան ԱՄՆ ԶՈւ-ում ծառայել միայն այն դեպքում, եթե բժշկական եզրակացություն ստացվի այն մասին, որ 36 ամիս նրանք «իրենց կենսաբանական սեռի մեջ կայուն են եղել» եւ պատրաստ են այդ վիճակով ծառայություն անցնել: Եթե «գենդերային դիսֆորիա» ախտորոշումը կատարվի զինծառայողի ծառայության ընդունվելուց հետո, նա ծառայությունը շարունակելու իրավունք կունենա, սակայն միայն իր կենսաբանական սեռով:
Նախկին նախագահ Բարաք Օբաման 2016 թվականին չեղարկել էր զինված ուժերում այն անձանց ծառայելու արգելքը, որոնց կենսաբանական սեռը ծնվելիս չի համապատասխանել նրանց գենդերային ինքնությանը: Ենթադրվում էր, որ 2017 թվականի հուլիսի 1-ից տրանսգենդերները կկարողանան պաշտոնապես ծառայության ընդունվել: Սակայն երկրի գործող նախագահ Դոնալդ Թրամփը 2017-ի ամռանը հայտարարել էր, որ նախատեսում է արգելքը վերականգնել: ԱՄՆ-ում դատարանները Թրամփի որոշումն արգելափակել էին: 2017 թվականի դեկտեմբերին Վաշինգտոնում եւ Վիջինիայում դատարանները մերժել էին ստորին ատյանի դատարանների որոշումները բողոքարկող վարչակազմի հայցը: Այսպիսով՝ 2018 թվականի հունվարի 1-ից տրանսգենդերությունը ծառայության ընդունվելուն խանգարող հանգամանք չէր:
Թրամփի վարչակազմը պնդում էր, որ տրանսգենդերներին ԶՈւ-ում ծառայության ընդունելու հնարավոր արգելքը ոչ մի ընդհանուր բան չունի խտրականության հետ եւ սոսկ վերացնում է կենցաղում ու զինվորականների միջեւ հարաբերություններում տարբեր դժվարությունները: Տարբեր գնահատականներով՝ ԱՄՆ բանակում արդեն ծառայում է 1,3 հազարից մինչեւ 6 հազար տրանսգենդեր, սակայն այս թվերը պաշտոնապես չեն հաստատվել:
