2020թ.-ի հունվարի 1-ից մեքենաները 4-5 անգամ թանկանալու են
2020թ.-ի հունվարի 1-ից ավտոմեքենաների մաքսատուրքը լինելու է ըստ շարժիչի հզորության, ինչը հանգեցնելու է նրան, որ 4-5 անգամ ավելանալու է այդ մեքենաների արժեքը: Այս մասին այսօր Ազգային ժողովի բակում ավտոներկրողների հետ հանդիպմանը հայտարարեց ԱԺ «Բարգավաճ Հայաստան» խմբակցության պատգամավոր Միքայել Մելքումյանը:«2020-ի հունվարի 1-ից արտոնյալ ժամկետի 5 տարին լրանում է: Եթե այդ մաքսազերծումը փոխվում է և դառնում է շաժիչի հզորության խմ-ով, 7 տարի և ավելի տարիք ունեցող մեքենաները նվազագույնը 4-4.5 անգամ թանկանում են, 5 տարի ունեցողները՝ 3-3.5 անգամ են թանկանում: Սա նշանակում է, որ դուք այլևս չեք կարողնալու այս գործով զբաղվել, աշխատատեղեր ենք կորցնելու, մաքսատուրքեր չեն գնալու բյուջե»,- ասաց Միքայել Մելքումյանը:
Ավտոնեկրողների տվյալներով՝ մաքսային դրույքաչափի ուժի մեջ մտնելուց հետո հարցականի տակ է դրվելու 20-30 հազար ավտոներկրողների և մեքենաների առքուվաճառքով զբաղվողների աշխատանքը:
«Դուք տասնյակ տարիներով զբաղված են այդ գործով և այն, որ պետությունը համապատասխան քանակի աշխատատեղեր չի կարողացել ստեղծել, մարդիկ տարիներով զբաղվել են, հմտացել են, իրենց օրվա հացը վաստակում են այդ ճանապարհով և այսօր պետական մակարդակով չկարողանալ այդ մարտահրավերի դեմն առնել, նշանակում է, պետությունը ձեռքերը լվացել է, մի կողմ է կանգնել և չի կարողանում ձեր ասած 20-30 հազար մարդու խնդիրը լուծել»,- նշեց պատգամավորը:
Միքայել Մելքումյանի խոսքով՝ 2017 թ.-ին ՀՀ ներկրվել է 34 հազար մեքենա, 2018 թ.-ին՝ 60 հազար. «այս տարի մենք սպասում ենք, որ 100 հազարը կանցնի: Ամենապարզ հաշվարկով, եթե 120 հազար մեքենան մոտ 5-6 հազար դոլարով հաշվարկեմ միջինը և դա բազմապատկենք 10 տոկոս մաքսատուրքով, նվազագույնը 60-70 մլն դոլար մենք կորցնելու ենք»:
«Բարգավաճ Հայաստան» խմբակցության պատգամավորը նաև տեղեկացրեց, որ մայիսին 2020 թ.-ի հունվարի 1-ից մեքենաների մաքսատուրքի բարձրացման հարցով լսումներ են կազմակերպելու, որին կհրավիրվեն նաև և փոխվարչապետ Մհեր Գրիգորյանը և նախարարներ:
«Ունենք մոտ 8 ամիս ժամանակ, կառավարությանը հստակ առաջարկել ենք, որ ԵԱՏՄ կոլեգիայի նիստում անպայման այս հարցը դնել շրջանառության մեջ, որովհետև ՀՀ-ն նաև ԵԱՏՄ մյուս երկրների համար շատ հարցերում արտոնություններին կողմ է քվեարկում: Կարելի է աշխատել, ինչ է եղել: Մենք չենք կարող եղած աշխատատեղերը կացնի մեկ հարվածով վերացնել և ասենք՝ բոլորդ զբաղվեք տեղեկատվական տեխնոլոգիաներով: Հուսանք, որ լուծումներ կլինի: Սա քաղաքական հարց պետք է լինի, Հայաստանի նկատմամբ վերաբերմունքի հարցը»,- նշեց պատգամավորը:
