18:41 - Աշուղ Ջիվանու և Վահան Տերյանի ծննդավայրերում կրկին տոն էր. Տեսանյութ         17:59 - Թուրքիայում Հայաստանի քաղաքացի է բերման ենթարկվել      17:07 - Նազիկ Ամիրյանը հերքում է, որ ամուսինն է տարիներ առաջ շղթայած անձին կտտանքների ենթարկել    

29 հուն 2019 15:40

Վթարի ենթարկված ոստիկանների մահվան մեջ մեղադրվող «Ճըվճըվ Արոյի» որդու գործով դատավարությունը դոփում է տեղում

Երևան քաղաքի ընդհանուր իրավասության դատարանում հունիսի 28-ին շարունակվեց ճանապարհային ոստիկանության երկու աշխատակիցների մահվան մեջ մեղադրվող «Ճըվճըվ Արոյի» որդու՝ Սարգիս Վարդանյանի, գործով դատական նիստը՝ դատավոր Հարություն Մանուկյանի նախագահությամբ։
Դատական նիստն սկսվեց մոտ կես ժամ ուշացումով, քանի որ դատարանում ամբաստանյալի ներկայությունն ապահովելու հետ կապված տեխնիկական խնդիրներ էին առաջացել։
Դատական նիստին ներկա էր նաև փաստաբան Լեռնիկ Հովհաննիսյանը։ Պարզվեց՝ ամբաստանյալն ուզում է երրորդ պաշտպանն ունենալ եւ դատարանը Լեռնիկ Հովհաննիսյանին ներգրավեց որպես ամբաստանյալ Սարգիս Վարդանյանի պաշտպան։
Դատարանը գտնվում է ապացույցների հետազոտման փուլում։ Ամբաստանյալ Վարդանյանը խնդրեց դատարանին հետազոտված համարել իրեղեն ապացույցները, իսկ գործի նյութերում որպես ապացույց առկա էր 2 ավտոմեքենա, տեսաերիզներ եւ այլ իրեր, որոնք դատավարության կողմերի համաձայնությամբ համարվեցին հետազոտված և հրապարակված։ Ապա հետաձգվեց դատական նիստը, քանի որ անցան վկաների հարցաքննությանը, որոնք չէին ներկայացել։
Հաջորդ դատական նիստը նշանակվեց հուլիսի 3-ին, որի ժամանակ նախատեսվում է դատակոչված 12 վկաներից հարցաքննել 5-ին։
Հիշեցնենք, որ ողբերգական դեպքը տեղի է ունեցել շուրջ 1,5 տարի առաջ. 2018թ. հունվարի 8-ին՝ ժամը 04:40-ի սահմաններում, Երևան քաղաքի Սայաթ-Նովա պողոտայի և Աբովյան փողոցի խաչմերուկում բախվել են «ԲՄՎX6» մակնիշի, 35 NT 388 համարանիշի և ճանապարհային ոստիկանության «Տոյոտա» մակնիշի, 243 II 02 հաշվառման համարանիշի ավտոմեքենաները, ինչից հետո «ԲՄՎX6» մակնիշի ավտոմեքենան դուրս է եկել երթևեկելի գոտուց և հարվածել գովազդային վահանակին: Ավտովթարի հետևանքով «Տոյոտա» մակնիշի, 243 II 02 համարանիշի ավտոմեքենայի վարորդ, ՃՈ 1-ին գումարտակի 6-րդ դասակի տեսուչ, ոստիկանության ավագ լեյտենանտ Ա.Դավթյանը և ուղևոր, ոստիկանության լեյտենանտ Խ.Գասպարյանն ստացած մարմնական վնասվածքներից մահացել են։
Պարզվել է, որ «ԲՄՎX6» մակնիշի ավտոմեքենայի ղեկին եղել է «Ճըվճըվ Արոյի» որդին՝ Սարգիս Վարդանյանը, որը թողնելով ճանապարհատրանսպորտային պատահարի վայրը, հեռացել է:
Նախնական քննության տվյալներով՝ Ս.Վարդանյանը Սայաթ-Նովա պողոտայի ուղղությամբ ընթացել է լապտերը միացված վիճակում՝ բնակավայրերի համար սահմանված թույլատրելի առավելագույն 60 կմ/ժ-ը գերազանցող արագությամբ և դրանով իսկ ստեղծել վթարային իրադրություն։
Մինչդատական վարույթում ձեռք բերված բավարար ապացույցների հիման վրա՝ Ս.Վարդանյանին մեղադրանք է առաջադրվել՝ ՀՀ քրեական օրենսգրքի 242-րդ հոդվածի 3-րդ մասի և 244-րդ հոդվածի հատկանիշներով։ Նրա նկատմամբ որպես խափանման միջոց է ընտրվել կալանավորումը:
Քրեական գործը դատարան է ուղարկվել դեռեւս 2018 թվականի հունիսին, սակայն դատավարությունը դեռ շարունակվում է։


Մեկնաբանություններ

Համընկնող լուրեր