Արտակարգ դեպք Նոր Նորքի 9-րդ զանգվածում. ավտոբուսն առաջ է ընթացել ու գլխիվայր ընկել ձորը
Երեւանում, այսօր՝ հուլիսի 6-ին արտակարգ դեպք է տեղի ունեցել. ժամը 12։30-ի սահմաններում Նոր Նորք վարչական շրջանի 9-րդ զանգվածում, Վիլնյուսի փողոցում, դեռևս անհայտ պայմաններում, թիվ 63 երթուղուն պատկանող, սակայն չշահագործվող ավտոբուսը նորոգման համար փորված փոսի վրա կայանված վիճակում առաջ է ընթացել և գլխիվայր հայտնվել ձորում։Shamshyan.com-ի հաղորդմամբ, ըստ նախնական տեղեկությունների՝ բարեբախտաբար, տուժածներ չկան։
Աղբյուրի տեղեկություններով, ավտոբուսը վերանորոգելիս են եղել, նույնիսկ շարժիչը վրան չի եղել։
Դեպքի վայրի հարևանությմաբ ապրող բազմաբնակարանային մի քանի շենքերի բնակիչներ ասում էին․ «Հրաշք ա, որ մարդ չի տուժել։ Ավտոբուսն էլ վերանորոգելիս են եղել, նույնիսկ շարժիչը վրան չի եղել։ Բայց էս տարածքը լրիվ դառել է խոզանոց, ավտոբուսների գերեզման է դարձել։ Մեռանք՝ Երևանի քաղաքապետարան ու Նոր Նորքի թաղապետարան ահազագնելով, որ էս ժեշտերը հեռացնեն էս տարածքից, բարեկարգեն, իսկ դիսպեչերական կետում էլ վարորդների համար սանհանգույց սարքեն, բայց ով է լսողը։ Թողնես՝ պատասխանատուները կուրծք ծեծելով, հայտարարեն, թե իրավիճակ է փոխվել։ Եթե էս ձև է փոխվել իրավիճակը, ապա՝ վայ մեզ։ Գոնե հիմա դաս քաղեն ու գան էս զիբիլը ստեղից տանեն։ Տարածքն էլ կարող են բարեկարգել, ծառեր տնկել։ Նույնիսկ, եթե ցանկություն ունենա, էս հատվածում սիրուն խաղահրապարակ կսարքի Նոր Նորքի թաղապետարանը։ Բայց դեհ, երևի, էդքան էլ սրտացավ չեն»։
