Կլիմայական փոփոխությունների պատճառով Երկիրը տենդով է բռնկվել.Այս տարվա հունիսը ամբողջ պատմության ընթացքում ամենաշոգն է եղել աշխարհում
2019 թվականի հունիս ամսին Երկիր մոլորակում 20-րդ դարի նույն ամիսների միջին ջերմաստիճանի համեմատ ավելի շոգ է եղել 2,2 աստիճանով, հաղորդում է BBC-ն՝ ԱՄՆ օվկիանոսային և մթնոլորտային ազգային վարչությանը հղումով:Զեկույցում, որը հրապարակվել է ԱՄՆ-ում սպասվող «վտանգավոր ջերմային ալիքներին» ընդառաջ, նշվում է, որ շոգն առավելապես զգացվել է Եվրոպայի որոշ հատվածներում, Ռուսաստանում, Կանադայում և Հարավային Ամերիկայում: Ավելի վաղ հրապարակված զեկույցներից մեկի համաձայն՝ այս տարվա հունիսիս Անտարկտիկայում սառույցների ռեկորդային փոքր ծավալ է գրանցվել:
ԱՄՆ օվկիանոսային և մթնոլորտային ազգային վարչությունը նախազգուշացրել է, որ առաջիկա օրերին երկրում ջերմաստիճանը +43,3 աստիճանի կհասնի, ինչն ազդեցություն կունենա 10 մլն մարդու վրա:
Հայտնի է, որ ջերմաստիճանի ուսումնասիրության պատմության մեջ՝ 1880թ.-ից ի վեր, 10 ամենաշոգ հունիս ամիսներից 9-ը դիտվել են վերջին 9 տարիներին:
Գիտնականները նախազգուշացրել են, որ կլիմայական փոփոխությունների արդյունքում կշարունակվեն ռեկորդային ջերմաստիճաններ գրանցվել:
«Կլիմայական փոփոխությունների պատճառով Երկիրը տենդով է բռնկվել, որը չի անցնի: Սա ռեկորդային շոգի առումով վերջին ամառային ամիսը չի լինի»,- ասել է ամերիկացի կլիմայագետ Քեթի Դելլոն:
