Տիգրան Ավինյանն է կանգնած այս փորձաքննության հետևում.400 հազար դոլար ուղղակի մսխվել է
Այսօր վաղ առավոտից կառավարության շենքի դիմաց բնապահպանական ճակատի ներկայացուցիչները բողոքի ակցիա էին իրականացնում Ամուլսարի ոսկու հանքի մշակման դեմ:Հիշեցնենք, որ Ամուլսարի հանքավայրի շահագործման հետ կապված տվյալները դիտավորյալ թաքցնելու գործով քննչական խմբի ղեկավար Յուրա Իվանյանը նախօրեին մամուլի ասուլիսում հայտնել էր փորձաքննության արդյունքների մասին:
Ակցիայի մասնակիցներ չեն ընդունում այս փորձաքննության արդյունքները ու այն կապում են փոխվարչապետ Տիգրան Ավինյանի հետ:
‹‹Հենց Տիգրան Ավինյանն է կանգնած այս փորձաքննության հետևում: Պատասխանատու ձևով կարող եմ հայտարարել, որ 400 հազար դոլար ուղղակի մսխվել է: Բայց ամենամեծ խնդիրն այն է, որ փորձելու են շահագործել Ամուլսարի հանքը››,-ասաց ակցիայի մասնակիցներից Բաբկեն Հարությունյանն ու շեշտեց, որ փորձաքննությունն իրականացվել է ‹‹Լիդիան Արմենիա››-ի տվյալների հիման վրա:
Ակցիայի մեկ այլ մասնակից ասաց, որ Գնդեվազ գյուղի գյուղապետը համայնքի սեփականության հողերը սեփականաշնորհել է իր տղայի անունով և հետո՝ մեկ տարի անց, 310.000 դոլարով վաճառել ‹‹Լիդիան Արմենիա››-ին:
‹‹Քննչական կոմիտեի քննիչն որոշում է կայացրել, որ 70 մլն դրամ գյուղապետը կարող է վճարել և ազատվել քրեական պատասխանատվությունից: Հարգելի հակակոռուպցիոն կառավարություն, դուք թաթախված եք լինելու նույն կոռուպցիայի մեջ, եթե արժանի գնահատական չտաք››,-ասաց մասնակիցը:
Ակցիայի մասնակիցները շեշտեցին, որ ցանկանում են ներկա գտնվել Կառավարության նիստին և ներկայացնել իրենց դիտարկումներն ու փաստերը, սակայն Ոստիկանության աշխատակիցները նրանց ներս չթողեցին՝ անցագիր չունենալու պատճառով:
Նրանց մոտեցավ ՀՀ վարչապետ Նիկոլ Փաշինյանի օգնական Նաիրի Սարգսյանն ու ասաց, որ պատրաստ է փաթեթը փոխանցել վարչապետի, սակայն մասնակիցներն ընդգծեցին, որ անձամբ են ցանկանում հանդիպել Փաշինյանի հետ, քանի որ փաստաթուղթը մեկնաբանության կարիք ունի:
Ցուցարարների անհանգստությանն արձագանքեց նաև փոխվարչապետ Տիգրան Ավինյանի օգնական Վարագ Սիսեռյանն ու խոստացավ զրուցել վարչապետի հետ:
Ակցիան դադարեցվեց, հաշվի առնելով վարչապետի գրաֆիկը, բայց մասնակիցները խոստացան կրկին վերադառնալ:
