ԱԺ-ն ամբողջությամբ ընդունեց նոր ուղղություններով չվերթով մեկնող անձանց օդի տուրքից ազատելու նախագիծը
Ազգային ժողովը երկրորդ ընթերցմամբ եւ ամբողջությամբ ընդունեց Քաղաքացիական ավիացիայի կոմիտեի մշակած օրենքի նախագիծը, որով առաջարկվում է օդի տուրքից ազատել նոր ուղղություններով չվերթով մեկնող անձանց: Նախագծին կողմ քվեարկեց 90 պատգամավոր, դեմ՝ 2, ձեռնպահ՝ 1։Օրենքով առաջարկվում է օդային տրանսպորտով մեկնող այն ֆիզիկական անձանց, որոնք սույն կետով սահմանված արտոնության ժամկետներում կմեկնեն նոր ուղղությամբ թռիչքներով, ազատել օդի տուրքից:
Տարածքային կառավարման եւ ենթակառուցվածքների նախարարի տեղակալ Վաչե Տերտերյանը պարզաբանել էր, թե ինչ է նշանակում նոր ուղղություն։ Ըստ այդմ՝ IATA կոդով օդանավակայանները դասակարգվում են, եւ, եթե այդ օդանավակայաններ մինչ այդ մեր օդանավակայանից թռիչքներ չեն եղել, եւ դա կդասակարգվի, որպես նոր ուղղություն, ապա կընկնի այս արտոնության տակ:
Այդ ավիաընկերությունները, փոխնախարարի խոսքով, դեպի այդ նույն օդանավակայաններ չվերթեր պետք է իրականացնեն ամառային եւ ձմեռային ժամանակաշրջանում: Սույն կետով նախատեսված արտոնության ժամկետը տրամադրվում է 36 ամսով (24 ամսով երկարաձգելու հնարավորությամբ), որը հաշվարկվում է ամիսների նվազման կարգով՝ սկսած տվյալ ուղղությամբ արտոնության տրամադրման հիմք հանդիսացող պայմաններին բավարարող առաջին ավիաընկերության առաջին թռիչքի մեկնարկից: Սույն կետով արտոնությունների կիրառման համապատասխան ժամկետների, այդ թվում՝ երկարաձգման, ավիափոխադրողի, չվերթերի հաճախականության պահանջների եւ չսպասարկվող ուղղության վերաբերյալ, ինչպես նաեւ այլ անհրաժեշտ տեղեկատվությունը հրապարակվում է Կառավարության սահմանած կարգով։
