Մեծ Բրիտանիան պատրաստ է աջակցել ԱՄՆ-ին Իրանի դեմ պատերազմում
Մեծ Բրիտանիան պատրաստ է հարված հասցնել Իրանին այն դեպքում, եթե Մերձավոր Արևելքում Իրանի և ԱՄՆ-ի միջև լարվածությունը, որն առաջացել է գեներալ Սուլեյմանիի սպանության հետևանքով, պատերազմի վերածվի, գրում է The Sun պարբերականը՝ իրազեկ աղբյուրին հղումով:Աղբյուրի խոսքով՝ Լոնդոնն առաջինը չի հարվածի։ Սակայն հակամարտության սրման դեպքում Լոնդոնը պատրաստ է աջակցել իր դաշնակցին՝ ԱՄՆ-ին՝ գործի դնելով ստորջրյա նավատորմը, որը զինված է «Տոմահավկ» թևավոր հրթիռներով։
Նման սուզանավերից մեկը լիակատար մարտական պատրաստության մեջ է գտնվում Իրանի վրա հարձակման համար բավարար հեռավորության վրա, գրում է աղբյուրը:
Բացի այդ, Լոնդոնում, ինչպես նշում է հրատարակությունը, ենթադրում են, որ հակամարտության հնարավոր սրման և սպառնալիքների փոխանակման ֆոնին Իրաքում տեղակայված զորակազմը պետք է ավելի ծանր սպառազինությամբ զինվի: Համապատասխան առաջարկությունները կուղարկվեն վարչապետ Բորիս Ջոնսոնին՝ Կարիբյան կղզիներում 12-օրյա արձակուրդից նրա վերադարձից հետո:
