Տեսանյութ.Բազմամարդ ակցիա Ախալքալաքում՝ խաղաղության պահանջով և ի զորակցություն ՀՀ-ի
Ասօր շուրջ երեք հազար ջավախահայեր հավաքվել են Ախալքալաքի ֆուտբոլային մարզադաշտում: Հայոց եռագույններ և Վրաստանի պետական դրոշներ ծածանելով՝ ակցիայի մասնակիցներն իրենց զորակցությունն են հայտնում Հայաստանի Հանրապետությանը, հայոց ազգային բանակին՝ միաժամանակ դատապարտելով ռազմական բախումները, որոնք տեղի են ունենում 2020 թ. հուլիսի 12-ից ՀՀ հյուսիս-արևելյան սահմանային հատվածում (Տավուշի մարզ) վերակտիվացած ադրբեջանական սադրանքների պատճառով: Հավաքի մասնակիցներն Ախալքալաքի մարզադաշտից Yerkir.am-ին փոխանցեցին, որ իրենց խաղաղ ակցիայով դատապարտում են պատերազմը, ռազմական գործողությունները, որոնք տեղի են ունենում Ադրբեջանի՝ ՀՀ-ի և Արցախի վրա պարբերաբար իրականցվող ոտնձգությունների բերումով: Մասնակիցներից մեկն էլ դատապարտեց ադրբեջանական փորձերը, որոնք միտված են սադրանքներ իրականացնել նաև Վրաստանում և Վրաստանին ևս ներքաշել հակահայկական արկածախնդրությունների մեջ: Ըստ նրա՝ Հայաստանը և Վրաստանը պետք է միասին բարգավաճեն, և իրենց խաղաղ ակցիան իր մեջ պարունակում է նաև այս ուղերձը: «Ջավախահայությունն ուշի ուշով հետևում է Հայաստանի Հանրապետությունում և Արցախում տեղի ունեցող իրադարձություններին, և մենք այսօր մեր վրդովմունքն ենք հայտնում այն առիթով, որ սահմաններին պարբերաբար տեղի են ունենում ռազմական բախումներ, զոհվում են մեր հայրենակից երիտասարդ զինվորներն ու սպաները», - նշեց խաղաղ ակցիայի մասնակիցը:
Փաստենք, որ ակցիան իր բազմամարդությամբ աննախադեպ է, և կորոնավիրուսի տարածման դեմ պայքարում Վրաստանի իշխանությունների իրականացրած խիստ միջոցառումների պայմաններում այն առաջին բազմամարդ միջոցառումն է:
