Բելառուսում մեկնարկել է համազգային գործադուլը.Լուկաշենկոյի խոսքով ՝ ոչ ոք չի ստիպի աշխատել նրանց, ովքեր դա չեն ցանկանում

Բելառուսում մեկնարկել է համազգային գործադուլը, որը նախօրեին «խոստացել» էին իրականացնել ցուցարարները, այս մասին հայտնում է NEXTA Live թելեգրամյան ալիքը։

Բելառուսով տարբեր ձեռնարկությունների աշխատակիցներ աշխատանքի չեն գնացել և դրա փոխարեն հավաքվել ու բողոքի ցույց են անցկացնում։

Մասնավորապես՝ գործադուլ են անում Բելառուսի ավտոմոբիլային գործարանի՝ «ԲելԱԶ»-ի, կալիումային պարարտանյութեր արտադրող «Բելառուսկալիյ»-ի, Մինսկի տրակտորի գործարանի, «Բելկարդ»-ի և այլ խոշոր գործարանների աշխատակիցները։

Ինչպես հայտնում է Tut.by կայքը, նրանք պահանջում են դադարեցնել ուժայինների կողմից ցուցարարների նկատմամբ բռնությունը, մեղավորներին պատասխանատվության ենթարկել, նախագահական ընտրությունների արդյունքներն անվավեր ճանաչել, նոր ընտրություններ անցկացնել, ազատ արձակել բոլոր քաղբանտարկյալներին:

***

Բելառուսի նախագահ Ալեքսանդր Լուկաշենկոն այսօր այցելել է Մինսկի անիվային քարշակների գործարան։ Տեղեկությունը հայտնում է ՌԻԱ Նովոստին:

Նա ելույթ է ունեցել բանվորների առջև և անդրադարձել գործադուլներին։ Լուկաշենկոյի խոսքով ՝ ոչ ոք չի ստիպի աշխատել նրանց, ովքեր դա չեն ցանկանում։

«Նախ` ինչ–որ ձեռնարկությունում 150, նույնիսկ 200 հոգին եղանակ չեն ստեղծում։ Երկրորդ՝ պետք է հասկանալ, որ «վատ» նախագահը հավելյալ մարդկանց էր պահում, որպեսզի նրանց փողոց չշպրտեին։ Ով ուզում է աշխատել, թող աշխատի։ Չեն ուզում աշխատել` մենք նրանց չենք ստիպի», - ասել է Լուկաշենկոն ։

Բելառուսի նախագահը գործարան է մեկնել իր ուղղաթիռով։