Լիբանանի նախագահը հերքել է վարկածը, թե պայթյունը «Հեզբոլլահ» շարժմանը պատկանող զենքի պահեստից է սկսվել, դեմ է պայթյունի միջազգային հետաքննությանը
Լիբանանի նախագահ Միշել Աունը դեմ է հանդես եկել Բեյրութի պայթյունի հետաքննության համար միջազգային հանձնաժողովի ստեղծմանը, սակայն թույլատրել է, որ արտասահմանցի քննիչները մասնակցեն գործի բացահայտմանը, գրում է «ՌԻԱ Նովոստի» գործակալությունը։«Մեր սահմանադրությունը պահանջում է, որ մեր դատական համակարգն ինքն իր ներքին խնդիրների հետաքննությամբ զբաղվի։ Սա մեր ոստիկանությանն արդեն իսկ աջակցող ֆրանսիացի, ամերիկացի և այլ քննիչների ներկայությունը չի բացառում»,-նշել է նա իտալական Corriere della Sera թերթին տված հարցազրույցի ընթացքում։
Պայթյունի պատճառների մասին խոսելիս Աունը նշել է, որ շրջանառվող վարկածներից որևէ մեկը չի բացառվում՝ չնայած որ առավել հավանական է համարվում դժբախտ պատահարի վարկածը։
«Լիբանանցի շատ ականատեսներ պնդում են, որ պայթյունից առաջ ինքնաթիռներ են տեսել կամ դրանց ձայնը լսել։ Նրանց լսել է պետք, անգամ եթե այդքան էլ վստահություն չեն ներշնչում։ Անգամ եթե թվում է, թե դա դժբախտ պատահար է, չեմ ցանկանում, որ ինձ մեղադրեն նրանում, թե ես չեմ լսում յուրաքանչյուրի ձայնը»,- ընդգծել է նա և կտրուկ հերքել վարկածը, թե պայթյունը «Հեզբոլլահ» շարժմանը պատկանող զենքի պահեստից է սկսվել։
Նախագահը նաև բացառել է ժամանակից շուտ իր պաշտոնանկության հնարավորությունը՝ հավելելով, որ Լիբանանում նոր ընտրություններ կարող են անցկացվել մեկ տարվա կամ վեց ամսվա ընթացքում։
