Ամբաստանյալների նկատմամբ կիրառել ամենախիստ պատիժը.Պավլիկ Մանուկյանը վերակենդանացման բաժանմունքում է
Երեւանի ընդհանուր իրավասության դատարանի Շենգավիթի նստավայրում՝ նախագահությամբ դատավոր Մեսրոպ Մակյանի, այսօր՝ օգոստոսի 12-ին, «Սասնա ծռերի» գործով ընթացող դատական նիստին գործով ամբաստանյալ Պավլիկ Մանուկյանի պաշտպան Զարուհի Փոստանջյանը դատարանին հայտնեց, որ իր պաշտպանյալը գտնվում է վերակենդանացման բաժանմունքում, ունի առողջական խնդիրներ։Նշենք, որ Պավլիկ Մանուկյանը դատարանի որոշմամբ ժամանակավոր հեռացված է նիստերի դահլիճից։
***
Երեւանի ընդհանուր իրավասության դատարանի Շենգավիթի նստավայրում՝ նախագահությամբ դատավոր Մեսրոպ Մակյանի, այսօր՝ օգոստոսի 12-ին, «Սասնա ծռերի» գործով դատական նիստին գործով տուժողների ներկայացուցիչները հանդես եկան ճառով։
Գործով տուժողները դատարանին միջնորդեցին գործով ամբաստանյալների նկատմամբ կիրառել օրենքով նախատեսված ամենախիստ պատիժը։
«Ինչ ասես՝ չտեսանք այս ընթացքում. ստախոսությունից մինչեւ դավաճանություն։ Այս ամբողջ խեղկատակության նպատակը սեփական կաշին փրկելն է։ Ուրախ եմ, որ այս ամենը շուտով կվերջանա։ Տագնապ ունեմ. արդարություն իրականացնողները կկարողանա՞ն օրենքին համարժեք պատիժ սահմանել, կկարողանա՞ն դիմակայել ճնշումներին, անտեսել սուտ մարդասիրական կոչերը։ Ի՞նչ ապստամբություն, ի՞նչ հայրենասիրություն. սրանք իրենց սասնա ծուռ են կոչում, ո՞ր սասնա ծուռն է իր հայրենիքի մայրաքաղաքում հարձակվում իր հայրենիքի ամրոցի վրա ու սպանում պահապաններին։ Մեղք է գրապանահատի մտածողությամբ ու պահվածքով սասնա ծուռ կոչել։ Ես արյան գին չեմ ուզում, արդարություն եմ պահանջում։ Իմ երեխաների հորը արդեն ոչ ոք չի վերադարձնի, բայց ոճրագործների իրական պատժի դեպքում կկարողանամ պատասխանել՝ ուր է մեր հայրը։ Պատկերացրեք, հարգելի դատարան, որ մարդասպանի քմահաճույքով զոհվել է ձեր հազարատը ու ոճրագործը ոչ թե թողություն է խնդրում, այլ ծիծաղում է ձեր ցավի վրա»,- ասաց տուժողի ներկայացուցիչը։
Տուժողի մյուս ներկայացուցիչը շեշտեց, որ գործով մեղադրող դատախազի կողմից միջնորդած պատիժներն անհամաչափ են եւ չեն համապատասխանում կատարված արարքների հանրային վտանգավորթւոյան բարձր աստիճանին։
«Զինված հարձակում, որը խլեց մարդկային կյանքեր, ծնողազուրկ դարձրեց 7 երեխայի, այրի դարձրեց մեզ։ Ինչպե՞ս կարելի է պետությունից նեղացած լինել եւ ամբողջ մեղքը գցել Ոստիկանության աշխատակիցների վրա՝ վրեժխնդիր լինելով նրանցից։ Եթե այս դատավճիռ մեղմ լինի, ուրեմն ամեն տեղից ելնողը կկատարի նույն զինված հարձակումը»,- ասաց ասաց տուժողի ներկայացուցիչը։
«Սասնա ծռերի» գործով դատավարությունը մոտենում է ավարտի
