Կազմուպատրաստ. Իրանը տեղեկացրել է Ադրբեջանի եւ ՀՀ սահմանին զրահատանկային ստորաբաժանման տեղակայման մասին
Իրանի հյուսիսարեւմտյան տարածաշրջանի բանակի շտաբի հրամանատար, երկրորդ բրիգադային գեներալ Ալի Հաջիլուն հայտարարել է, որ Ադրբեջանի եւ Հայաստանի սահմանին տեղակայված են զրահատանկային ստորաբաժանումներ, հայտնում է Mehr-ը։ Նա ուրբաթ հանդես էր եկել հայտարարությամբ՝ նշելով, որ Իրանի բանակը պատասխանատվություն է կրում հակառակորդի ցանկացած ագրեսիայից երկրի սահմանամերձ շրջանների պաշտպանության համար։
Վկայակոչելով Հայաստանի եւ Ադրբեջանի միջեւ վերջին բախումները՝ գեներալը հայտարարել է, որ Իրանի հյուսիս-արեւմուտքում երկրի ցամաքային զորքերը կատարում են տարածաշրջանում խաղաղության եւ անվտանգության ապահովման առաքելություն։
Նա նաեւ հայտնել է, որ հյուսիսարեւմտյան տարածքում բանակի շտաբն արդեն մի շարք ուժեր է ուղարկել այդ շրջանին հետեւելու համար, եւ ներկայումս այդ առաքելությանը մասնակցում են նաեւ զրահատանկային ուժերը։
Արեւմտյան Ադրբեջան իրանական նահանգը սահմանակից է երեք երկրներին՝ Ադրբեջանին, Թուրքիային եւ Իրաքին։ Իրանական բանակի տարածքային շտաբը տեղակայված է Ուրմիա քաղաքում։
