Երևանի կողմից դրական նշաններ ստանալու դեպքում, Բաքուն պատրաստ է հնարավոր ամեն բան անել երկկողմ կապերի հաստատման համար
Ադրբեջանի նախագահ Իլհամ Ալիևը երկրի դիվանագիտական ակադեմիայի «Նոր հայացք Հարավային Կովկասում. հետկոնֆլիկտային զարգացում և համագործակցություն» թեմայով միջազգային խորհրդաժողովում իր ելույթի ժամանակ հայտարարել է, որ դժվար է կանխատեսել, թե ապագայում ինչ հարաբերություններ կունենան հայերը և ադրբեջանցիները, գրում է Minval.az-ը:«Կարծում եմ, որ դա մեծապես կախված կլինի քաղաքական գործիչների կամքից և ողջախոհությունից: Ես հավատում եմ, որ կամուրջներ կառուցելու համար անհրաժեշտ է, որ մենք ավելի ակտիվ լինենք այստեղ և Երևանում»,- ասել է նա` ընդգծելով, որ այս հարցում հայկական կողմի դիրքորոշումն իրեն անհայտ է:
Բացի այդ, Ալիևը նշել է՝ որպես նախագահ և որպես ապագային նայող մարդ, Ադրբեջանն այդ կապերը ստեղծելու համար կանի ամեն բան, եթե Հայաստանը դրական նշաններ ուղարկի:
«Այն ամենը, ինչ մենք արել ենք միակողմանիորեն, ես այդ մասին արդեն նշել եմ, դրա հստակ ցուցիչն է: Հավատացեք, որ մենք կարող էինք թույլ չտալ այս ամենը, և ոչ ոք մեզ չէր կարող ստիպել: Մենք դա գիտակցաբար ենք արել»,- ընդգծել է նա:
