Դժգոհում են Ալիևից՝ նա յուրացրել է իշխանության բոլոր լիազորությունները, նաև Ղարաբաղի 10,000 ք. կմ- ն համարում է իր անձնական սեփականությունը
Հունիսի 4-ին թշնամուն հանձնված Քարվաճառում ականի պայթյունից երեք ադրբեջանցու, այդ թվում՝ երկու լրագրողի մահը Ադրբեջանում ներքաղաքական տարաձայնությունների պատճառ է դարձել: Ադրբեջանի ընդդիմադիր «Մուսավաթ» կուսակցության առաջնորդ Արիֆ Հաջըլըն իր ֆեյսբուքյան գրառման մեջ մեղադրանքներ է առաջադրել Ադրբեջանի նախագահ Իլհամ Ալիևին: Նա իր ընդգծված դժգոհությունն է հայտնել այն փաստից, որ յոթ ամիս շարունակ Ադրբեջանի քաղաքացիներին թույլ չեն տալիս այցելել Արցախի՝ իրենց վերահսկողության տակ անցած տարածքներ: Ըստ նրա՝ ականների առկայությունը ներկայացվում է որպես արգելքի պատճառ, մինչդեռ պատերազմից նույնիսկ յոթ ամիս անց ականների պայթյուններից մահվան դեպքերը չեն նվազում:«Մեր գլխին ընկած բոլոր խնդիրների, ներառյալ՝ մեր երկու լրագրողի և այլ քաղաքացիների մվան պատասխանատվությունը նույնպես անձամբ Իլհամ Ալիևի վրա է»,- գրել է Հաջըլըն՝ շեշտելով, որ բոլորը պետք է պատասխանատու լինեն իրենց արարքների համար և պատժվեն հանցագործությունների համար, բայց Ադրբեջանի ղեկավարը ոչ միայն յուրացրել է իշխանության բոլոր լիազորությունները, այլ նաև Ղարաբաղի 10,000 քառակուսի կիլոմետրը համարում է իր անձնական սեփականությունը՝ շեշտելով, որ միայն ինքը գիտի ՝ ինչ անել, երբ և ինչպես:
Արիֆ Հաջըլըի քննադատական այս հրապարակումը դժգոհություն է առաջացրել Ադրբեջանի խորհրդարանի պատգամավորների շրջանում: Անկախ պատգամավոր Սահիբ Ալիևը սուր քննադատության է ենթարկել Հաջըլըին, քանի որ նաս չի մեղադրում Հայաստանի ղեկավարությանը լրագրողների մահվան մեջ: «Մինչ վերջերս ոչ ոք այնքան ցածր չէր ընկնում, որքան Ալի Քերիմլին և Ջեմիլ Հասանլըն: Արիֆ Հաջըլըն ցույց տվեց, որ քաղաքականության մեջ ավելի խոր փոսեր կան»,- ասել է Սահիբ Ալիևը` շեշտելով, որ Արիֆ Հաջըլըն աշխատում է թշնամու հետ ներդաշնակ:
