Տեսանյութ.3 հայաստանցիների մոտ հաստատվել է սիբիրյան խոցի մաշկային ձեւը, աղբյուրը դեռևս անհայտ է
3 հայաստանցիների մոտ հաստատվել է սիբիրյան խոցի մաշկային ձեւը: Այս մասին լրագրողների հետ զրույցում հայտնել է առողջապահության նախարարի պաշտոնակատար Անահիտ Ավանեսյանը:Նրա խոսքով, պացիենտների վիճակն այժմ գնահատվում է որպես միջին ծանրության եւ թեթեւ: Նրանց ամբողջապես կտրամադրվի անհրաժեշտ բուժման կուրսը:
Նախարարի պաշտոնակատարի խոսքով, վերջին 3-4 օրերին ՀՎԿԱԿ-ի մասնագետները կատարում են համայնքային այցեր, նմուշառումներ են կատարում եւ ուսումնասիրում բոլոր կասկածելի դեպքերը:
Իրականացվում են նաեւ կանխարգելիչ միջոցառումներ, եւ ամբողջ համայնքը եւ շրջակայքը խիստ հսկողության տակ են, նշեց Անահիտ Ավանեսյանը, հավելելով, որ վարակի աղբյուրը դեռ հայտնի չի:
Հիշեցնենք, որ Գեղարքունիքի մարզի Վանևան և Տորֆավան համայնքներում կենդանիների շրջանում սիբիրյան խոցի հայտնաբերված դեպքերի առնչությամբ՝ ԱՆ հիվանդությունների վերահսկման և կանխարգելման ազգային կենտրոնի «Ռեֆերենս լաբորատոր կենտրոնի» կողմից հունիսի 29-ին կատարվել է նմուշառում այդ համայնքների 7 բնակչից։ Նրանցից 3-ի մոտ հաստատվել է «սիբիրյան խոց» ախտորոշումը:
