Pfizer-ը եւ BioNTech-ը առաջարկում են օգտագործել պատվաստանյութի 3-րդ չափաբաժինը որպես «բուստեր»՝բարձր մակարդակ ապահովելու համար
Pfizer եւ BioNTech ընկերությունները պատրաստվում են առաջարկել ԱՄՆ սննդանյութերի եւ դեղամիջոցների որակի սանիտարական հսկողության վարչությանը (FDA) եւ Դեղամիջոցների եվրոպական գործակալությանը (EMA) հավանություն տալ կորոնավիրուսի դեմ պատվաստանյութի երրորդ չափաբաժնին որպես «բուստեր»։ Այս մասին տեղեկացնում է Reuters-ը՝ հղում կատարելով Pfizer ընկերության գլխավոր գիտաշխատող Միքայել Դոլսթենին։«Բուստերային» ներարկման փորձարկման արդյունքները ցույց են տվել, որ պատվաստանյութի երրորդ չափաբաժինը կարող է պետք գալ լիակատար պատվաստումից հետո 6-12 ամսվա ընթացքում՝ պաշտպանության բարձր մակարդակ ապահովելու համար։ Ընկերությունների տվյալներով՝ պատվաստումից կես տարի հետո պատվաստանյութի արդյունավետությունը հիվանդությանը դիմակայելու հարցում նվազում է, չնայած դրա արդյունավետությունը հիվանդությունների լուրջ ընթացքը կանխելու գործում մնում է բարձր։
«Հետազոտության ելակետային տվյալները ցույց են տալիս, որ «բուստերային» չափաբաժինը, որը ներարկվում է երկրորդ դեղաչափից 6 ամիս հետո, (...) առաջ է բերում իմունային պատասխան հակամարմինների տիտրերով, որոնք 5-10 անգամ ավելի բարձր են, քան երկու դեղաչափից հետո»,- ասվում է ընկերությունների համատեղ հայտարարությունում։
Դոլսթենը հավաստիացնում է, որ «բուստերային» դեղաչափը կարող է պահպանել կորոնավիրուսի բոլոր տարբերակների դեմ արդյունավետության բարձր մակարդակը, ներառյալ «դելտան»։
