77 մարդու սպանած Անդերս Բրեյվիկը գրել է իր մասին ֆիլմի սցենար և մտադիր է վաճառել 7 մլն ֆունտ ստերլինգով
Նորվեգացի հանցագործ Անդերս Բրեյվիկը, որը պատիժ է կրում նորվեգական բանտում, 20 նամակ է ուղարկել կինոգործիչներին` առաջարկելով իր կյանքի մասին ֆիլմ նկարահանել:Ինչպես հաղորդում է The Sun on Sunday պարբերականը, սցենարի և ինքնակենսագրական գրքի իրավունքի համար Բրեյվիկը 7 մլն ֆունտ ստերլինգ է պահանջում: Աղբյուրի տվյալներով`42-ամյա Բրեյվիկը, որը 2012 թվականին 21 տարվա ազատազրկման է դատապարտվել 77 մարդու սպանության համար, գրել է իր մասին ֆիլմի սցենար և մտադիր է վաճառել այն օգտագործելու իրավունքը:
Բացի այդ, նշվում է, որ հանցագործը բանտում հարցազրույցի հրավերներ է ուղարկել:
Կենսագիր Օսնե Զեյերստադը, որը գիրք է գրել Բրեյվիկի մասին, հայտնել է, որ նա «երբեք չի զղջացել իր արածի համար»: Նրան բեմ է անհրաժեշտ, որտեղ կարող է կիսվել իր մտքերով և ուղերձներով ու ավելի շատ կողմնակիցներ ձեռք բերել:
Բրեյվիկը պատիժ է կրում 2011 թվականին Նորվեգիայում երկու տարբեր ահաբեկչական գործողություններ իրականացնելու համար: Նախ նա ռումբ էր պայթեցրել Օսլոյի կառավարական թաղամասում, ապա կրակահերթ բացել Նորվեգական աշխատավորական կուսակցության երիտասարադկան ճամբարի հյուրերի և աշխատակիցների ուղղությամբ: 2018 թվականի հուլիսին նրա գործողությունների հետևանքով մահացած անձանց հիշատակին հուշարձան է կանգնեցվել Օսլոյում:
Բրեյվիկը բազմիցս նշել էր, որ հարձակումներն իրականացրել է նորվեգական մշակույթի անկումը կանխելու նպատակով` ինքնապաշտպանության իրավունքի և բազմամշակութայնության դեմ պայքարի շրջանակում:
