Սուրիկ Խաչատրյանի որդին կրակել է Սյունիքի մարզպետի որդու վրա.նոր տեղեկություններ «Հրապարակ»

***

Սուրիկ Խաչատրյանի որդին (Սյունիքի նախկին մարզպետ, առավել հայտնի է որպես «Լիսկա») Տիգրան Խաչատրյանը կրակել է Սյունիքի ներկայիս մարզպետ Մելիքսեթ Պողոսյանի որդու վրա: Թեպետ երկու կողմի հետ մեզ կապվել չհաջողվեց, բայց մեր ունեցած նոր տեղեկություններով նախկին եւ ներկա մարզպետների որդիները միայնակ չեն եղել «ռազբորկայի» վայրում՝ Գորիսի Ակսել Բակունցի հուշարձանի հարակից տարածքում։ Ավելին` նրանք  փոխհրաձգությունից  չեն էլ տուժել, տուժել են այլ անձիք, որոնց գիշերը տեղափոխել են հիվանդանոց, իսկ  նրանցից մեկին հասցրել են  Երևան:

Ըստ տեղեկությունների՝ վիրավորներից մեկը Մելիքսեթ Պողոսյանի  որդու մտերիմն է, մյուսը՝ Տիգրան Խաչատրյանի մորեղբոր որդին, որի վիճակն առավել ծանր է: Շրջանառվող լուրերի համաձայն՝ վիճաբանությունը քաղաքական հողի վրա է ծավալվել :Նախկին  մարզպետի որդուն ափերից հանել է ներկայիս իշխանության պահվածքը, իր  մտերիմների նկատմամբ հալածանքներ սկսելու գործելաոճը:

Մարզպետ Մելիքսեթ Պողոսյանի որդին նախկինում ունեցած հաշիվները մաքրելու նպատակով՝ կանչել է Սուրիկ Խաչատրյանի որդուն։ Ըստ ականատեսների՝ Լիսկայի որդին՝ Տիգրան Խաչատրյանը ապտակել է Կարեն Պողոսյանին, որից հետո վերջինս իր մեքենայից հանել է իր ինքնաձիգը և անկանոն կրակոց բացել։ Վիրավորվել է Սուրիկ Խաչատրյանի ազգականը և Կարենի ընկերը, որի վիճակը ծայրահեղ ծանր է։