Որևէ վատ բան չկա լավ վարձատրության մեջ ,պարգևավճարները եղել են, կան և կլինեն
ՔՊ–ի իշխանության տարիներին Հայաստանում թոշակներն ավելացել են շուրջ 3000 դրամով, իշխանության քաղաքական թիմի անդամները ստացել են 120 մլն դոլարի պարգևավճարներ։ Այս մասին այսօր ԱԺ–ում հայտարարեց «Հայաստան» խմբակցության անդամ Արեգնազ Մանուկյանը։«Ե՞րբ եք դադարեցնելու ինքնապարգևատրումների այս մեխանիզմը, և ե՞րբ են մեր կենսաթոշակառուների թոշակները դառնալու արժանապատիվ»,– ասաց Մանուկյանը` հարցն ուղղելով ՔՊ–ի կողմից ԱԺ աշխատանքի և սոցիալական հարցերի և առողջապահության հարցերի մշտական հանձնաժողովի նախագահի պաշտոնում առաջադրված Հերիքնազ Տիգրանյանին։
Թեկնածուն նշեց, որ թոշակների նման բարձրացման չափը դեռ շատ հեռու է ոչ միայն իշխանական թիմի առջև դրված գերնպատակից, այլև բավարար ու արժանապատիվ գոյություն ապահովելու չափից։ Տիգրանյանը նաև հայտնեց, որ իշխանության ծրագրով մինչև 2025թ.-ը թոշակները պետք է ավելանան շուրջ 40 000 դրամի չափով։
Ինչ վերաբերում է պարգևավճարներին, Տիգրանյանը շեշտեց, որ 2020թ–ի փետրվարից ի վեր պատգամավորները որևէ պարգևավճար չեն ստացել։ Իսկ գործադիր իշխանությունում, ըստ նրա` պարգևատրումները «եղել են, կան և կլինեն»։
«Որևէ վատ բան չկա լավ վարձատրության մեջ։ Եթե մարդը բարեխիղճ է և կատարել է աշխատանքները, նրա կատարողականի գնահատման արդյունքում տրվում է պարգևատրում»,– ասաց նա։
