Իսրայելն ուժեղացնում է նախապատրաստությունն Իրանի միջուկային օբյեկտների վրա հնարավոր հարձակմանը
Իսրայելն ուժեղացնում է նախապատրաստությունն Իրանի միջուկային օբյեկտների վրա հնարավոր հարձակմանը։ Այս մասին հայտարարել է Իսրայելի պաշտպանության բանակի շտաբի պետ Ավիվ Կոհավին։ Իսկ պաշտպանության նախարար Բենի Գանցն ասել է, որ Իսրայելը կիրականացնի այնպիսի գործողություններ, որոնք «նախկինում երբեք չեն եղել», եթե տարածաշրջանային պատերազմ սկսվի, գրում է Times of Israel-ը։Ավիվ Կոհավին Կնեսետի արտաքին հարաբերությունների եւ պաշտպանության հանձնաժողովին ասել է, որ բանակն «արագացնում է օպերատիվ պլանավորումը եւ պատրաստվածությունն Իրանի եւ ռազմական միջուկային սպառնալիքի դեմ պայքարելու համար»: Բարեբախտաբար, անցյալ շաբաթ հաստատված բյուջեն թույլ է տալիս պայքարել բազմաթիվ սպառնալիքների դեմ»։
Նրա մեկնաբանությունները հնչեցվել են այն կապակցությամբ, որ Իսրայելի ռազմաօդային ուժերը, ինչպես ակնկալվում է, կվերսկսեն Իրանի միջուկային ծրագրին հարված հասցնելու մարզումները:
Կոհավին նաեւ ասել է Կնեսետի անդամներին, որ Իսրայելն «անվտանգության բազմաթիվ մարտահրավերների» է բախվում մի շարք ճակատներում: «Անցած տարի մենք շարունակել ենք գործել մեր թշնամիների դեմ առաքելություններով եւ գաղտնի գործողություններով Մերձավոր Արեւելքում: Իսրայելի պաշտպանության ուժերը կշարունակեն արձագանքել սպառնալիքներին եւ վճռականորեն կարձագանքեն ինքնիշխանության ցանկացած խախտման Գազայի հատվածում կամ Իսրայելի հյուսիսում»,- ասել է նա։
Հունվարին Կոհավին հայտարարեց, որ հանձնարարել է զինվորականներին սկսել նոր հարձակման ծրագրեր մշակել Իրանի միջուկային օբյեկտներին հարվածելու համար, իսկ անցյալ ամիս, ինչպես հաղորդվում է, կառավարությունը միլիարդավոր շեքելներ է խոստացել այդ ծրագրերի իրականացման համար:
