Տեսանյութ.Կքննարկենք նաեւ վարչապետի թեկնածուի հարցը.Արթուր Վանեցյանն ինձ ոչինչ չի ասել պայքարից դուրս գալու մասին
Արթուր Վանեցյանը դեռեւս ապրիլի 18-ից հայտարարել է փողոցային պայքարի մասին, հայտարարելուց առաջ իր պայքարի ընթացքում եւ մինչեւ երեկ եղել ենք շատ ակտիվ կապի մեջ, մշտապես քննարկել ենք այն որոշումները, որոնք հայտարարվել է այս հրապարակում: Այս մասին, այսօր՝ հունիսի 16-ին, Ֆրանսիայի հրապարակին հարակից այգում կազմակերպված մամուլի ասուլիսի ժամանակ նշեց ԱԺ փոխխոսնակ իշխան Սաղաթելյանը՝ անդրադառնալով հարցին, թե ինչով է պայմանավորված, որ վերջին օրերին Վանեցյանը չի երեւում «Դիմադրության» շարժման հետ:«Արթուր Վանեցյանը եղել է այս շարժման կարեւոր մասնակիցներից մեկը՝ իր կուսակցությունով եւ պայքարը բերել, հասցրել ենք այստեղ: Իր հետագա որոշումների մասին կհայտնի Արթուր Վանեցյանը: Առնվազն ինձ որեւէ բան պայքարից դուրս գալու, հետ կանգնելու, այլ գործունեության մասին, ինձ բան չի ասել:
Ես մեծապես կարեւորում եւ արժեւորում եմ այն ճանապարհը, որ միասին անցել ենք: Թե սրանից հետո ինչ կլինի, դա կասի Արթուր Վանեցյանը: Առնավազն ինձ բան չի ասել»,-ասաց Սաղաթելյանը:
Ես շարժման առաջին օրերից հայտարարել եմ, որ ես այս շարժման եւ զինվորն եմ, եւ առաջամարտիկն եմ, եւ պատասխանատուն եմ, եւ շարժման ելքի ու արդյունքների համար ունեմ եւ քաղաքական, եւ անձնական պատասխանատվություն:
Հարցին, թե հնարավո՞ր է, որ օգոստոսի 2-ից հետո «Դիմադրության» շարժումը որպես վարչապետի թեկնածու առաջ քաշի իր թեկնածությունը, Իշխան Սաղաթելյանը պատասխանեց. «Որեւէ մեկի համար գաղտնիք չի եղել, որ շարժման աշխատանքները համակարգել եմ ես, վերջնական որոշումներն ըդնունելու պատասխանատվությունը դրված է եղել ինձ վրա: Այդ համաձայնությանը եկել ենք շարժմանը մասնակցող բոլոր քաղաքական ուժերի հետ խորհրդակցելուց հետո:
Ինչ վերաբերում է հետագա պրոցեսներին՝ առաջնորդ, վարչապետի թեկնածու, մենք հենց առաջին օրվանից ասել ենք, որ այն մարդիկ, որոնք գալիս են եւ գալու են այս հրապարակ, չեն գալիս ինչ-որ մեկին վարչապետ դարձնելու համար:
Նիկոլ Փաշինյանին հեռացնելը շարունակում է մնալ մեր գլխավոր օրակարգը, բայց օգոստոսից հետո այդ գործիքակազմին ավելանում է եւս մեկը՝ պաշտոնանկության գործընթացը: Դրա համար պետք է երկու ուղղությամբ աշխատանք։. Առաջինը, պաշտոնանկության համար քաղաքական եւ իրավական հիմքերի ստեղծում, որն առկա է, սրա հանրային, ժողովրդական պահանջի դրսեւորում, եւ երկրորդը, ժողովրդի կողմից վարչախպետի թեկնածուի առաջադրում:
Մենք այս գործընթացը կմեկնարկենք այն ժամանակ, երբ հաջողության հասնելու բավարար հիմքեր կլինեն: Այդ ժամանակ, օրենքն է նաեւ պահանջում, որ երբ գնում ես պաշտոնանկության գործընթացով, պարտավոր ես ներկայացնել ժողովրդի կողմից վստահություն վայելող թեկնածու: Երբ կմտնենք այդ օրակարգի մեջ, այդ ժամանակ կքննարկենք նաեւ այդ հարցը: Այս պահին մեր մեջ վարչապետի թեկնածուի քննարկում տեղի չի ունեցել»:
