Ալիևը մուսուլմանական երկրներին տրամադրում է Հայաստանի դեմ
Ադրբեջանի նախագահ Իլհամ Ալիևը մուսուլմանական երկրներին տրամադրում է Հայաստանի դեմ։ Այսօր թյուրքական պետությունների կազմակերպությունների գագաթաժողովում ելույթ ունենալով նա հիշել է Ակնայի վիճակը։«Աղդամը միջազգային փորձագետները համարում են Կովկասի Հիրոսիմա։ Այնտեղ 67 մզկիթներից 65-ն ավերված են, իսկ մնացած երկու մզկիթներին հասցվել է մեծ վնաս, նրանք օգտագործվել են խոզեր ու կովեր պահելու համար։ Դա վիրավորական է ողջ մուսուլմանական աշխարհի համար»,-ասել է Ալիևը։
Նա դժգոհել է, որ Հայաստանն ականապատել է տարածքները, որոնք հիմա օկուպացված են Ադրբեջանի կողմից։ Ալիևի խոսքով, այդտեղ 1 մլն ական է տեղադրվել, իսկ 2020 թ. պատերազմի ավարտից մինչ օրս ականների պայթյունի հետևանքով մահացել կամ ծանր վիրավորվել են Ադրբեջանի 270 քաղաքացիներ։
Ալիևն ուրախություն է հայտնել, որ Թուրքիայի նախագահը երեք անգամ եղել է Ղարաբաղում։ Նա ադրբեջանական զինված ուժերի կողմից օկուպացված Արցախ է հրավիրել թյուրքական պետությունների ղեկավարներին, ապա շնորհակալություն է հայտնել Ուզբեկստանի ու Ղազախստանի նախագահներին, որոնց ցուցաբերած աջակցությամբ Վարանդայում կառուցվելու է դպրոց ու ստեղծագործական կենտրոն։
