Պատժել Պուտինին ու Ալիեւին, մտցնել միջազգային խաղաղապահ առաքելություն․Բայդենին կոչ է արվել ուղիղ միջամտել Արցախում
Լոս Անջելեսի քաղաքապետ Քերըն Բասը և քաղաքային խորհրդի նախագահ Փոլ Գրեգորյանը պաշտոնական գրությամբ դիմել են ԱՄՆ նախագահ Ջո Բայդենին` կոչ անելով օգնության հասնել Արցախի ժողովրդին: Այս մասին հաղորդում է «Արմենպրես»-ը՝ վկայակոչելով Բասի և Գրեգորյանի հրապարակած նամակը:Ըստ նամակի հեղինակների՝ ՌԴ նախագահ Վլադիմիր Պուտինը միայն Ուկրաինայի ժողովրդավարությունը չէ, որ փորձում է խաթարել, և նրա գործողությունների հետևանքով այսօր Արցախի 120 հազար քաղաքացիները բախվել են ցրտից, սովից ու դեղորայքի պակասից դանդաղ մահվան դատապարտվելու սպառնալիքին:
«Հումանիտար աղետի պատճառը Արցախի ժողովրդին պաշարմամբ պատանդ պահող միտումնավոր շրջափակումն է՝ իրականացված Ադրբեջանի բռնապետ Ալիևի կողմից, ռուսական զորքերի աջակցությամբ։ Այս անօրինական շրջափակման միջոցով երկու բռնապետությունները ցանկանում են պատժել Արցախին և Հայաստանին, որոնք համարձակվել են տարածաշրջանում առաջ տանել ժողովրդավարությունը և կայունությունը», – նշում են նամակի հեղինակները՝ հավելելով, որ ԱՄՆ-ի կողմից համարձակ գործողությունների բացակայությունը կարող է հանգեցնել տարածաշրջանում հայերի ներկայության ցեղասպանական ոչնչացման:
Ներկայացնելով դեկտեմբերի 12-ից Արցախում ստեղծված ծանր իրավիճակը՝ Լոս Անջելեսի քաղաքապետն ու քաղաքային խորհրդի նախագահը Ջո Բայդենին կոչ են անում օգնության հասնել Արցախի ժողովրդին հետևյալ կերպ.
Տրամադրել ԱՄՆ-ի ուղիղ մարդասիրական աջակցությունն Արցախին, այդ թվում՝ սննդամթերք և դեղորայք:
Հստակ ուղերձ հղել Պուտինին ու Ալիևին, որ ԱՄՆ-ն պահանջում է և գործողություններ կձեռնարկի՝ երաշխավորելու անվտանգ թռիչքների իրականացում Արցախի բնակչությանն օգնություն հասցնելու համար:
Դիվանագիտական ջանքեր գործադրել Բաքու-Ստեփանակերտ ուղիղ երկխոսության կայացման համար՝ երաշխավորելով արցախահայության իրավունքներն ու անվտանգությունը:
Պնդել, որ Արցախում ռուսական խաղաղապահները փոխարինվեն միջազգային խաղաղապահ առաքելությամբ:
Շոշափելի գործողություններ ձեռնարկել Ադրբեջանի դեմ և պատասխանատվության ենթարկել այդ երկրին իր պատերազմական հանցագործությունների համար՝ համաձայն Ազատության աջակցության ակտի 907-րդ բաժնի և Մագնիտսկու ակտի:
Նամակի հեղինակները հույս են հայտնել, որ ԱՄՆ-ն անգործ չի հետևի, թե ինչպես են ագրեսիվ բռնապետություններն իրենց ժողովրդավարական հարևանների դեմ ցեղասպանական քաղաքականություն վարում:
Այսպիսով, Ֆրանսիայից հետո ԱՄՆ պաշտոնական մակարդակով նույնպես արձանագրում է Ռուսաստանի ուղիղ պլանավորումը եւ մասնակցությունը Հայաստանի դեմ ագրեսիային ու ցեղասպան գործողություններին։ Ինչպես Ֆրանսիայի քաղաքական կուսակցությունների՝ նախագահ Մակրոնին ուղղված նամակում, այս պարագային էլ Բայդենին կոչ է արվում ուղիղ միջամտությունն Արցախում։ Մինչ այժմ Պուտինն ու Ալիեւը միջազգային դատապարտումից խուսափում էին շնորհիվ ՀՀ իշխանության եւ նրա հենակ ռուսանպաստ «ընդդիմության» ջանքերի, սակայն երեւում է դրանք էլ արդեն չեն օգնի։
