6000 ոստիկան է տեղակայվել Իրանի և Թուրքիայի հետ Քրդստանի սահմանին
Վկայակոչելով Իրաքի ներքին գործերի նախարարին քրդական ԶԼՄ-ները, հայտնում են, որ 6000 ոստիկաններ են տեղակայվել Իրանի եւ Թուրքիայի հետ Քրդստանի ընդհանուր սահմաններին։Որոշումներ են ընդունվել Իրանի եւ Թուրքիայի հետ Իրաքի սահմանները վերահսկելու վերաբերյալ եւ բյուջեին միջոցներ են հատկացվել անցակետերի կառուցման, տեսախցիկների տեղադրման եւ դիտաշտարակների կառուցման համար, ասել է Իրաքի ներքին գործերի նախարար Աբդուլ Ամիր ալ-Շամմարին, հաղորդում է Kurdistan 24-ը։
Ըստ լրատվամիջոցի, Իրաքի ներքին գործերի նախարարն ասել է, որ 17 տեղ են գտել Թուրքիայի հետ սահմանի երկայնքով բազաներ ստեղծելու համար. «Սինջարում Թուրքիայի հետ սահմանին 65 կիլոմետր երկարությամբ բետոնե պատ է կառուցվել»,- հավելել է իրաքցի նախարարը։
Իսկ Իրանի եւ Իրաքի սահմանապահ զորքերի հրամանատարների միջեւ նոյեմբերի 29-ին կայացած հանդիպման շրջանակում երկու կողմերի միջեւ ստորագրվել է փոխըմբռնման հուշագիր սահմանային հսկողության վերաբերյալ։
Իրանի սահմանապահ ոստիկանության հրամանատար, բրիգադային գեներալ Ահմադ Ալի Գուդարզին ընդգծել է Իրանի համար հարեւան երկրների սահմանապահների հետ փոխգործակցության կարեւորությունը։
