Պահանջում ենք ՀՀ իշխանություններից.Ոչ մի իշխանություն իրավունք չունի «խաղաղության» իմիտացիայով Արցախի համար անընդունելի կարգավիճակի նշաձողն իջեցնել

«Հարկ ենք համարում նշել, որ Արցախի Հանրապետության ներկայիս իրավա-քաղաքական կարգավիճակը ձևավորվել է համաժողովրդական կամքի արտահայտությամբ՝ երեք հանրաքվեների, դրանց արդյունքում ընդունված Սահմանադրությամբ և պետական իշխանությունների կայացման ճանապարհով։ Արցախի պետականությունը և պատմական հայրենիքում ազատ ու անկախ ապրելու արցախցիների իրավունքը բացարձակ արժեքներ են, որոնցից անգամ պատերազմի սպառնալիքը չի կարող արցախցիներին հետ պահել:
Պահանջում ենք Հայաստանի Հանրապետության իշխանություններից հրաժարվել աղետալի դիրքորոշումից և առաջնորդվել բացառապես նշված արժեքներով: Ոչ մի իշխանություն իրավունք չունի «խաղաղության» իմիտացիայով Արցախի համար անընդունելի կարգավիճակի, ինչպես նաև միջազգայնորեն ճանաչված ինքնորոշման իրավունքի բանակցային սկզբունքի նշաձողն իջեցնել: ՀՀ իշխանությունները պարտավոր են առաջնորդվել Անկախության հռչակագրով, ՀՀ Սահմանադրությամբ և ՀՀ Գերագույն Խորհրդի՝ 1992թ. հուլիսի 8-ի որոշումով:
Հարգելի´ հայրենակիցներ, Արցախի ինքնորոշման իրավունքի իրացման և Արցախի Հանրապետության կայացման սուրբ գործի համար կոչով դիմում ենք Ձեզ՝ միացեք «Հայաքվե» նախաձեռնությանը, դարձեք նրա շարժիչ ուժը, ակտիվ մասնակցեք և մասնակից դարձրեք ստորագրահավաքին Ձեր շրջապատի հայրենասեր մարդկանց, քանի որ այն համահայկական նախագիծ է՝ առանց որևէ սահմանափակման կամ կուսակցական պատկանելության»,- նշվում է հայտարարության մեջ։