ՀՅԴ-ում ոչ միանշանակ է ընդունվել Դավիթ Իշխանյանի առաջադրումը. «Ժողովուրդ»
«Ժողովուրդ» օրաթերթը գրում է. «ՀՅԴ խմբակցության անդամ Դավիթ Իշխանյանի՝ Արցախի ԱԺ նախագահի պաշտոնում առաջադրվելու հարցը թեժ քննարկումների թեմա է դարձել ՀՅԴ հայաստանյան կառույցում:«Ժողովուրդ» օրաթերթի տեղեկություններով՝ ՀՅԴ-ում ոչ միանշանակ է ընդունվել նրա առաջադրումը, այն էլ՝ Արցախի նախագահ Արայիկ Հարությունյանի ղեկավարած քաղաքական ուժի՝ «Ազատ հայրենիք-ՔՄԴ»-ի կողմից: Դաշնակցականները օրեր շարունակ քննարկել են նրա առաջադրման հարցը, դաշնակցականների մեծ մասը դեմ է արտահայտվել. ասել են, որ պետք չէ առաջադրել Արայիկ Հարությունյանի ղեկավարած քաղաքական ուժի կողմից, կրել նրա հետ բոլոր անհաջողություններն ու հայրենիքի շահը չսպասարկող որոշումները, այլապես կստացվի, որ կիսում են նրա տեսակետները եւ հավասարապես պետք է պատասխանատվություն կրեն Արցախում ստեղծված իրավիճակի համար: Վերջում, սակայն, Դավիթ Իշխանյանը որոշում է կայացրել, որ, այնուամենայնիվ, կընդունի Արցախի իշխանությունների առաջարկը և կդառնա ԱԺ նախագահ:
Այս հարցի շուրջ «Ժողովուրդ» օրաթերթը մեկնաբանություն խնդրեց ՀՅԴ անդամ, ԱԺ պատգամավոր Քրիստինե Վարդանյանից։
«Ինչպես ցանկացած կարևոր հարց, այնպես էլ ՀՅԴ Բյուրոյի անդամ Դավիթ Իշխանյանի՝ Արցախի ԱԺ նախագահ ընտրվելու հարցը հանգամանորեն քննարկվել է ՀՅԴ-ում, այդ թվում՝ ՀՅԴ Հայաստանի կառույցում։
Պայմանավորված հարցի բնույթով և Արցախում ստեղծված իրավիճակով՝ հարցը քննարկվել է հանգամանորեն, և հաշվի են առնվել հարցի բոլոր նրբերանգները։ Իհարկե, այստեղ կան բազմաթիվ մտահոգություններ, սակայն դրանցից առավել է Արցախի անվտանգության և Արցախի ժողովրդի ինքնորոշման իրավունքի պաշտպանության հարցը։ Հենց սա է եղել կայացված որոշման հիմքը։
ՀՅԴ-ում ընդունված է հարցերը քննարկել հանգամանորեն և անդրադառնալ հարցերի բոլոր կողմերին. այստեղ որևէ այլ ինտրիգ փնտրելու հարկ չկա։ ՀՅԴ-ում անհատական որոշումներ չեն կայացվում, այս որոշումը ևս բացառություն չէ։ Այս որոշման հիմքերը ներկայացված են այսօր ՀՅԴ Բյուրոյի ներկայացուցիչ ընկեր Հակոբ Տեր-Խաչատրյանի տված մեկնաբանության մեջ։ Ինչ վերաբերում է ընկեր Դավիթ Իշխանյանին, վերջինս վայելում է իր ընկերների լիակատար վստահությունը»,- ասաց նա»։
Հոդվածն ամբողջությամբ կարող եք կարդալ «Ժողովուրդ» թերթի՝ 08․ 08․ 23 թ համարում։
