Ֆրանսիայից, ԼՂ ուղարկվող բեռնատարներին ևս մեկն է միացել, սակայն սայլը տեղից չի շարժվում
15-րդ օրն է՝ 2 տասնյակից ավելի բեռնատար Կոռնիձորի սահմանային հատվածում է: Քիչ առաջ այնտեղ է հասել ևս մեկ բեռնատար: Այդ մասին ասել է Սյունիքի մարզում աշխատող «Լուրերի» թղթակիցը:Բեռնատարների մասով որևէ շարժ չկա: Այդ մասին ուղիղ եթերի ժամանակ ասել է ԼՂ-ում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը:
«Քիչ առաջ հումանիտար բեռներ տեղափոխող մեր ավտոշարասյանը միացավ ևս մեկ բեռնատար: Սա ֆրանսիական մի շարք քաղաքների և ռեգիոնների նախաձեռնությունն է՝ ի համերաշխություն և հաջակցություն շուրջ 8 ամիս շրջափակման մեջ գտնվող ԼՂ ժողովրդին»,- ասել է նա՝ հավելելով, որ ավելի քան 20 տոննա հումանիտար բեռը ներառում է սնունդ և մակարոնեղեն, և որ այն ուղարկվել է Փարիզ քաղաքի մի շարք ռեգիոններից:
«Ողջունելի է, որ Հայաստանի մարդասիրական այս նախաձեռնությանն արձագանքում և միանում են ոչ միայն Հայաստանում մասնավոր ընկերությունների կողմից, այլև բարեկամ Ֆրանսիայի հիշյալ քաղաքների և ռեգիոնների կողմից: Սա վկայում է ևս մեկ անգամ, որ ԼՂ-ում սրվող հումանիտար ճգնաժամը ստանում է է՛լ ավելի լայն հնչեղություն, միջազգային հնչեցություն, և ապացուցում է, որ անհրաժեշտ են հրատապ քայլեր Լաչինի ապօրինաբար փակված միջանցքը բացելու և ԼՂ հումանիտար հասանելիություն ապահովելու համար»,- ասել է Վարդան Սարգսյանը:
Հարցին՝ երաշխիքներ կա՞ն, որ Կոռնիձորի սահմանային հատվածում տեղակայված ուղեբեռն անցնի ԼՂ, Վարդան Սարգսյանը պատասխանել է. «Մենք շարունակում ենք մեր քայլերը և քննարկումները հումանիտար ուղեբեռը ԼՂ տեղափոխելու նպատակին հասնելու համար: Ցավոք, այս պահին կարող եմ ասել, որ որևէ նորություն կամ արձագանք չկա այս մասով»:
