Ադրբեջանն արդեն սկսել է Իրանով անցնող ավտոմայրուղու շինարարությունը՝ շրջանցելով Հայաստանը. ՌԴ փոխվարչապետ
Ռուսաստանի կառավարության փոխվարչապետ Ալեքսեյ Օվերչուկը Սամարղանդում՝ Վերոնայի XVI Եվրասիական տնտեսական համաժողովի շրջանակներում, մեկնաբանել է Ռուսաստանի, Հայաստանի և Ադրբեջանի եռակողմ աշխատանքային խմբերի աշխատանքը՝ տրանսպորտային կապերի ապաշրջափակման և սահմանների սահմանազատման վերաբերյալ։«Հայաստանի և Ադրբեջանի միջև սահմանի սահմանազատումը երկկողմանի խնդիր է։ Իսկ համանախագահները Հայաստանի և Ադրբեջանի կառավարությունների փոխվարչապետներն են։ Ինչ վերաբերում է այս գործընթացում Ռուսաստանի Դաշնության մասնակցությանը և դերին, ապա մենք միշտ պատրաստ ենք աջակցություն ցուցաբերել։ Մենք միշտ պատրաստ ենք աջակցել և տրամադրել փաստաթղթեր, ներառյալ քարտեզագրական փաստաթղթերը, որոնք պատմականորեն գոյություն ունեն Ռուսաստանում:
Ինչ վերաբերում է կապի ապաշրջափակմանը, ապա ֆորմալ առումով կա աշխատանքային խումբ։ Վերջին անգամ հավաքվել էինք հունիսի 2-ին։ Մեղրիով երկաթուղու շինարարության մեկնարկի վերաբերյալ նշանակալի համատեղ հայտարարության տեքստը նույնպես մեծ մասամբ պատրաստ է։
Ինչ վերաբերում է բուն ճանապարհի կառուցմանը, ապա գիտեք, որ Ադրբեջանն արդեն սկսել է Իրանի տարածքով ավտոմայրուղու շինարարությունը՝ շրջանցելով Հայաստանի տարածքը։ Ինչպես մեզ հայտնի է, Ադրբեջանի Հանրապետության և Իրանի Իսլամական Հանրապետության միջև ստորագրվել է նաև հուշագիր՝ Իրանի տարածքով Հայաստանի տարածքը շրջանցող երկաթուղու կառուցման մասին»,- ընդգծել է Օվերչուկը, հայտնում է Alpha News-ը։
Նա նաև մեկնաբանեց Հայաստանում կառուցվող Հյուսիս-Հարավ մայրուղու կառուցումը և դրա կարևորությունը Ռուսաստանի համար՝ որպես Հյուսիս-Հարավ ընդհանուր միջանցքի մաս։
«Սա շատ կարևոր ենթակառուցվածքային ծրագիր է, որը Իրանից Հայաստանի տարածքով կհասնի Վրաստան։ Եվ, իհարկե, հաշվի առնելով Վերին Լարսը, այն նույնպես շատ կարևոր դեր կունենա մեր Հյուսիս-Հարավ միջանցքում։ Մենք վստահ ենք դրանում»,- նշել է ՌԴ փոխվարչապետը։
