Թուրքիան հուսով է, որ խաղաղության համաձայնագիրը կստորագրվի արդեն 2025 թվականին
Թուրքիայի արտգործնախարար Հաքան Ֆիդանը կարևոր է համարել Հայաստանի վարչապետ Նիկոլ Փաշինյանի ուղերձները Ադրբեջանի հետ խաղաղություն հաստատելու վերաբերյալ։
«Մեր տարածաշրջանում բացվել է երկարատև խաղաղության, կայունության և բարգավաճման հնարավորությունների պատմական պատուհան: Ես հավատում եմ, որ Հայաստանը նույնպես կգործի երկարաժամկետ ռազմավարական հեռանկարով։
Այս ուղղությամբ կարևոր ենք համարում վարչապետ Փաշինյանի դրական ուղերձները։ Մենք նշում ենք, որ այն դիրքորոշում է արտահայտում խաղաղության օգտին և նպաստում է այս գործընթացում դրական առաջընթացին։ Անկարան շարունակում է նպաստել կողմերի միջև առանց միջնորդների երկկողմ բանակցություններին։ Խաղաղության հաստատումն իր հետ կբերի նոր հնարավորություններ, որոնք տարածաշրջանի զարգացման համար այլընտրանք չունեն»,- ասել է Ֆիդանը։ Նա ընդգծել է, որ աչքի է զարնում «Փաշինյանի դրական և համարձակ պահվածքն այս հարցում»։
Նախարարի խոսքով՝ մի քանի կետեր մնում են անհամաձայնեցված Հայաստանի և Ադրբեջանի միջև, և Թուրքիան հուսով է, որ խաղաղության համաձայնագիրը կստորագրվի արդեն 2025 թվականին։