Ամեն անգամ, երբ խոսեք Թուրքիայի եւ Ադրբեջանի մասին, հիշեցնելու եմ, որ դուք միակ իշխանությունն եք, որը զինադադարից հետո տարածք է զիջել
Ազգային ժողովում «Հեռուստատեսության եւ ռադիոյի մասին» ՀՀ օրենքում փոփոխություններ եւ լրացում կատարելու մասին նախագծի քննարկման ժամանակ վիճեցին ՀՀԿ-ական պատգամավոր Արման Սաղաթելյանն ու «Ելք» խմբակցության ղեկավար Նիկոլ Փաշինյանը:
Ընդդիմադիր խմբակցության պատգամավորները նախագծի քննարկմանը մտահոգություն հայտնեցին, որ առաջարկվող փոփոխությունը, որով նախատեսվում է ՀՀ տարածքում թվային ռադիոհեռարձակման անցնելու շրջանակում ռադիոհաճախականությունների նոր մրցույթներ հայտարարել, կարող է խախտել խոսքի ազատությունը, քանի որ Հայաստանում կան ռադիոընկերություններ, որոնք լրատվական բնույթի են, իսկ դրանց թվայնացումը կարող է խնդիրներ առաջացնել:
ՀՀԿ-ական Արման Սաղաթելյանը հիշեցրեց, որ սա նաեւ արվում է անվտանգության նկատառումով՝ ադրբեջանական եւ թուրքական ռադիոհաճախականությունները ՀՀ տարածքում արգելափակելու նպատակով:
Այս հիմնավորումը բարկացրեց Նիկոլ Փաշինյանին: Նա հորդորեց պատեհ-անպատեհ չօգտագործել «Թուրքիա- Ադրբեջան» տերմինաբանությունը՝ որպես ընդդիմությանը հակազդելու միջոց:
«Ամեն անգամ, երբ դուք խոսեք Թուրքիայի եւ Ադրբեջանի մասին, ես ձեզ հիշեցնելու եմ, որ դուք միակ իշխանությունն եք, որը զինադադարից հետո տարածք է զիջել: Չհամաձարկվեք ամեն անգամ մեզ հիշեցնել Թուրքիայի, Ադրբեջանի մասին, հակառակ դեպքում կհիշեցնենք քառօրյա պատերազմը, Արցախն ու Հայաստանը պաշտպանելու ձեր ձախողումը, դեռեւս չի քննվել, թե ՀՀԿ-ական որ բարձրաստիճան ներկայացուցիչները ձախողեցին պատշաճ պաշտպանությունը: Կոչ եմ անում մյուս անգամ մեր խմբակցության հարցերին ի պատասխան հայրենասիրական դրոշներ չբարձրացնել կոնտեքստից դուրս»,- ասաց նա:
ԱԺ փոխնախագահ Էդուարդ Շարմազանովն իր հերթին կողմերին հորդորեց հանդուրժողականություն ցուցաբերել միմյանց նկատմամբ, ապա արտահերթ ելույթ ունեցավ:
«Այս խնդրում հիմնական մեխն ինֆորմացիոն անվտանգությունն է: Սահմանամերձ շրջաններին, որոնք սահմաններ ունեն Թուրքիայի եւ Ադրբեջանի հետ, հնարավորություն ենք տալիս ստանալ ճիշտ տեղեկատվություն հայկական ռադիոընկերություններից: Մենք չենք ասում, որ իդեալական իշխանություն ենք եղել, Հայաստանում չի եղել իդեալական իշխանություն, բայց մեր աշխատանքի դրական գնահատականը տրվել է ապրիլի 2-ին: Թուրքիայի եւ Ադրբեջանի հետ կապված բացի առաջընթացից մենք հետընթաց չենք ապրել: Ինչ վերաբերում է ապրիլյան պատերազմին, մեր ընդհանուր միջոցներով մենք կարողացել ենք կանգնեցնել եւ ձախողել Ադրբեջանի քաղաքական ղեկավարության նպատակները, Ադրբեջանն ունեցել է ֆիասկո: Պե՞տք է դասեր քաղենք, այո, պետք է քաղենք»,- ասաց Շարմազանովը:
