Միապետը տվել է արտոնություն տարբեր մարդկանց. Մելքումյանը՝ ՀՀԿ-ականներին
Ինձ տխրեցրեց այն փաստը, որ ՄԻՊ 2017թ. տարեկան հաշվետվության զեկույցի ժամանակ հարց հնչեցրեց 3 պատգամավոր, ելույթ ունեցավ 2 պատգամավոր: Սա վկայում է այն մասին, որ ոլորտի նկատմամբ կա՛մ հավատ չկա, կա՛մ այնքան գոհ են, որ լրացուցիչ ասելու բան չկա: Այս մասին այսօր՝ մայիսի 22-ին, ԱԺ-ում «2017թվականի ընթացքում ՀՀ ՄԻՊ-ի գործունեության, մարդու իրավունքների եւ ազատությունների պաշտպանության վիճակի մասին» տարեկան հաղորդումը քննարկելիս իր ելույթում նշեց ԱԺ փոխնախագահ, «Ծառուկյան» խմբակցության պատգամավոր Միքայել Մելքումյանը:«Այն, ինչ նկարագրված է հաղորդման մեջ, թույլ է տալիս ասել, թե ոնց կարող էր այս երկիրն այս պրոբլեմներով շարունակել ապրել: Դրանք լրջագույն խնդիրներ էին, հանրային կյանքի գրեթե բոլոր ոլորտներում, որոնց մասին գիտեն բոլորը»,- ասաց Մելքումյանը:
Անդրադառնալով տուգանքների թեմային, նա նշեց. «Նվազագույն աշխատավարձը որ 55,000 դրամ է, ո՞նց կարող է մարդը այդքան տուգանք տալ: Մենք դիմել ենք, հարցերը չեն լուծվել: Մարդու իրավունքները զանգվածային խախտելու համար պատասխանատվության ենթարկվող եղե՞լ է, թե ոչ: Կոնկրետ մարդիկ կան, որոնք սոցիալական, տնտեսական աղետի են բերել երկիրը ու պատասխանատվություն չեն կրել»:
Մելքումյանը նկատեց, որ եղել է քաղաքական միապետություն, միապետը տվել է արտոնություն տարբեր մարդկանց, առաջացել է տնտեսական մոնոպոլիա, իրավական համակարգը սպասարկել են այդ հարաբերությունները, որ ներդրում այդտեղ չգա. «Սա մարդու իրավունքների զանգվածային խախտում է: Այս մոդելի հեղինակը քաղաքական մեծամասնությունն է այս դահլիճում: Իրենց օրենքները բերել էստեղ դակել են, ընդդիմության օրինագծերըմերժել են բոլորը, ընդդիմությունն էլ գնացել է փողոց, այնտեղից եկել է, որ իր նախագծերն իրականացնի: Քաղաքականություն է, երբ մի մասը զիջում ես, որ ամբողջը պահպանես, եթե չեք կարողացել զիջել, ուրեմն դուք հեռու եք քաղաքականությունից: Իրավունք չունեք քաղաքականությունից խոսել:
