Պոլիկլինիկաների անձնակազմի աշխատավարձերի բարձրացում,դեղերի գների իջեցում. Առողջապահության նախարար
Այսօր կառավարության նիստից հետո, լրագրողների հետ ճեպազրույցում ՀՀ առողջապահության նախարար Արսեն Թորոսյանը նշեց, որ դեղերի ներմուծման մենաշնորհի վերացման մասով աշխատանքներ ենք տանում:«Նոր կարգ ենք ընդունում դեղերի գուգահեռ ներմուծման կարգի վերաբերյալ, որպեսզի միայն մի ընկերությունը չկարողանա այն ներմուծել», — ասաց նախարարն՝ ընդգծելով, որ սա նաև մրցակցային դաշտ կստեղծի, արդյունքում էլ գնի նվազում կլինի:
Նրա խոսքով՝ աշխատանքներ են տարվում նաև դեղերի գրանցման ընթացակարգերի հեշտացման մասով: Թորոսյանը նշեց, որ պետությունն իր վրա կվերցնի այն դեղերի գրանցումը, որոնք անհրաժեշտ են, մինչդեռ շահութաբեր չեն, հետևաբար դրանց գրանցումից շատերը խուսափում են:
Անդրադառնալով ոլորտի մասնագետների աշխատավարձերի բարձրացմանը՝ Թորոսյանը նշեց, որ առաջնահերթ պետք է վերանայել պոլիկլինիկաների անձնակազմի աշխատավարձերը, որոնք շատ ցածր են:
«Այն, ինչ հիմա կասեմ, վերջնական լուծում չընդունեք, բայց սկսած նրանից, որ բուժաշխատողներին էլ կարելի է սոցփաթեթ տրամադրել, վերջացրած աշխատավարձի բարձացումով, այդ որոշումներին կհանգենք այն ժամանակ, երբ բոլորն արդյունավետ ծախսած փողերը կհավաքվեն: Դա կլինի 1-2 ամսվա մեջ: Մենք ծրագիր առ ծրագիր գնում ենք, հիմա մի քանի տեղ ստուգումներ եմ սկսել, երբ հետ բերված գումարը ունենաք, կսկենք այդ ուղղությամբ գումարը ծախսել», — ասաց Թորոսյանը:
«Կվերանայվի ամեն ինչ, ինչը հուզում է հասարակությանը՝ սկսած տուգանքների չափերից, վերջացրած ծխելու արգելքի վայրերը վերանայելուց», — հավելեց նա:
