Առաջին անակնկալ խնդիրները կառավարության համար
Հայաստանում մեկը մյուսի հետեւից կոռուպցիոն սխեմաներ են բացահայտվում, չնայած ամենամեծ կեղտն այլ վայրում է: Խոսքը միջազգային պայմանագրերի մասին է, որոնք հաճախ ծառայել են իշխող ռեժիմի իշխանության երկարաձգմանը: Հանուն դրա իշխանություն ունեցողները վաճառել են ամեն ինչ, անգամ հայրենիքը: Հայաստանի նոր կառավարությունը բախվում է այդ խնդրին:Առաջին անգամ դա տեղի է ունեցել պարտադիր կուտակային կենսաթոշակային համակարգի հարցը քննարկելիս: Հավանաբար, կառավարությունում քննարկել են կենսաթոշակային հիմնադրամների հետ պայմանագիրը եւ հասկացել, թե Հայաստանն ինչ թակարդում է հայտնվել: Փորձագետները նշում են, որ Հայաստանի նախկին իշխանությունը պայմանագիր է ստորագրել, որով բնակչության եկամուտների 10 %-ը 40 տարով «գրավ է» հանձնել օտարերկրյա հիմնադրամներին: Դրա դիմաց իշխանությունները նոր վարկեր են ստացել, որոնք թույլ են տվել կատարել սոցիալական պարտավորությունները եւ պահել իշխանությունը:
Նոր կառավարությունն անգամ չի կարողացել հետաձգել պարտադիր կուտակային համակարգի ներդրումը: Նախկին իշխանությունների ստորագրած պայմանագրերի համաձայն՝ կուտակային համակարգից հնարավոր է դուրս գալ միայն մեծ տուգանքների գնով:
Մեկ այլ հարց է գազի գինը: Մոսկվայում Պուտինի հետ զրուցած Փաշինյանն ասել է, որ Հայաստանի համար ռուսական գազի գինը բացառիկ է, բայց սպառողին հասնում է սահմանային գնից երկու անգամ թանկ: Բանն այն է, որ Հայաստանը գազը գնում է ըստ երկու պայմանագրերի: Դրանցից մեկը ստորագրել են երկրների կառավարությունները, եւ դրանով Հայաստանն իսկապես Ռուսաստանից գնում է ամենաէժան գազը: Բայց Հայաստանի ներսում գազն այլ պայմանագրով է բաշխվում, որը ստորագրել են Հայաստանի ու Ռուսաստանի էներգետիկայի նախարարությունները 2013 թվականին: Դա խայտառակ համաձայնության օրինակ է, որում հայկական կողմը գրեթե իրավունքներ չունի:
Շատ փորձագետներ այդ պայմանագիրը գնահատել են որպես հակապետական քայլ: Նոր կառավարությունը կամ պետք է մեղադրի նախկին կառավարությանը եւ փորձի չեղարկել այն, կամ էլ ենթարկվի դրան:
Ընդդիմադիր լրատվամիջոցներն այս օրերին հիշեցնում են նախորդ իշխանության եւս մեկ «խելամիտ» որոշման մասին, երբ վարչապետ Տիգրան Սարգսյանը վաճառեց Հայաստանի ոսկու ողջ պաշարը: Ilur.am-ը գրում է, որ իրականում ոսկին ոչ թե համաշխարհային շուկայում են վաճառել, այլ կիսել են իրար մեջ՝ էժանով գնելով ոսկին, որը հետո կրկնակի թանկացավ: Հայաստանն այդպիսով զրկվեց ոսկու պաշարից եւ ստիպված էր գրավադրել ոչ թե ոսկին ու արտարժույթի պաշարները, այլ բնակչության եկամուտների 10%-ը:
Եվս մեկ խոշոր միջազգային սկանդալ է հասունանում: Ջերմուկում չեն դադարում Ամուլսարի շահագործման դեմ բողոքի ակցիաները: Ամուլսարի ոսկու հանքը բրիտանա-ամերիկյան կոնսորցիումին փոխանցելու մասին պայմանագիրը նույնպես նախկին իշխանություններն են ստորագրել: Նոր կառավարությունը ստիպված է հետեւել պայմանագրին՝ փորձելով հանգստացնել բնապահպաններին ու քաղաքացիական հասարակությանը:
Փորձագետները զգուշացնում են, որ այս հարցը հեշտությամբ չի լուծվի, եւ կառավարությունը ստիպված է լինելու կոշտ քայլերի գնալ: Նոր կառավարությունը դեռ կասկածի տակ չի դնում նախորդ իշխանությունների ստորագրած պայմանագրերը, թեեւ նախկինում դատապարտում էր դրանք:
Աղբյուր՝ lragir.am
