Քոչարյանն արդարացվելու է, և հասարակությունն իմանալու է, թե ինչպես են իրեն տարիներ շարունակ ստել
«Ռոբերտ Քոչարյանի գործում վերջին մեկ շաբաթում էական փոփոխություններ չեն եղել, մենք շարունակում ենք լինել վստահ, մեր դիրքորոշումներում որևէ բան չի փոխվել: Իրավական տեսակետից մենք համարում ենք, որ այս ծավալներով, այս մեղադրանքով, այս գործընթացներով պարոն Քոչարյանը պետք է ամբողջությամբ արդարացվի»,-այսօր՝ օգոտոսի 4-ին, լրագրողների հետ հանդիպման ժամանակ հայտարարեց երկրորդ նախագահի փաստաբաններից Արամ Օրբելյանը:
Օրբելյանի խոսքերով, մինչ այս պահը մյուս կողմից փորձ է արվում ավելի շատ հուզական դաշտի վրա ազդել, ինչը դատապարտելի է. «Ի վերջո մեր բոլորի նպատակը պետք է լինի Մարտի 1-ի ամբողջական և վերջնական բացահայտումը, ոչ թե պոտենցիալ թշնամանքի ավելացումը կամ պակասեցումը, կամ ինչ-որ խմբերի բաժանումը, սոցիալական լարվածության ավելացումը»:
Քոչարյանի գրասենյակի ղեկավար Վիկտոր Սողոմոնյանն իր հերթին հայտարարեց, թե որևէ կասկած չկա, որ վերջինիս առաջադրված մեղադրանքներն անհիմն են, Քոչարյանն արդարացվելու է, և հասարակությունն իմանալու է, թե ինչպես են իրեն տարիներ շարունակ ստել՝ հրամցնելով կեղծ փաստեր և կեղծ տեղեկություններ՝ նաև խաղալով մարդկանց հուզական տրամադրությունների վրա: