«Հերիք է խաղեր անել ու խորհրդարան մտցնել ՀՀԿ-ին». Տիգրան Ուրիխանյանը՝ ՔՊ-ին

Ազգային ժողովում այսօր Ընտրական օրենսգրքի վերաբերյալ ելույթ ունեցավ Ծառուկյան դաշինքի պատգամավոր Տիգրան Ուրիխանյանը: «Ինձ համար զարմանալի է, որ մեր ՔՊ գործընկերները վարչապետի գլխավորությամբ հայտարարում են, թե ԱԺ-ն պետք է որոշի՝ որ ընտրական օրենսգրքով գնալ, իրենց համար միևնույն է, իրենք անցողիկ են: Բևեռեք ուշադրությունը, որ պետք է անցողիկ հնարավորություններ ստեղծել բոլորի համար հավասարապես, ոչ միայն ՔՊ համար: ՀՀԿ պատգամավորներն էին, որ հանկարծ դարձել են հայ հեղափոխական, գնում են իշխանության դռների առաջ երդվում են հեղափոխությանը ու հնարավորություն են ստեղծում մեր թիկունքի հետևից նորից ռեյտինգայինով, հիմար ձևով ճողոպրել խորհրդարան: Բերեք փոխեք այս ընտրական օրենսգիրքը, հերիք է խաղեր անել ու խորհրդարան մտցնել ՀՀԿ-ին», ասել է նա:

Ելք խմբակցության ղեկավար Լենա Նազարյանը պատասխանել է Ուրիխանյանին՝ հիշեցնելով, որ իրենք են բերել նախագիծը: «Մենք ենք նպատակ ունեցել հեշտացնել, պարզեցնել ընթացակարգերը քաղաքական այն ուժերի համար, որոնք շատ հանրային աջակցություն չունեն, ովքեր փոքր են, նոր են ձևավորվում: Մենք խնդիր ունենք հենց այդ հարցը լուծել, քաղաքական դաշտն ընդլայնել: Եթե նկատեցիք, երեկ Ելք խմբակցության բոլոր պատգամավորները ներկա են եղել, գրանցվել են և կողմ են քվեարկել: Դուք այլ խմբակցությունների պատգամավորների մասին ասեք, նաև ձեր», նշել է Նազարյանը:

«Քանի որ ԱԺ որակյալ աշխատանքը կապված է ԱԺ ձևավորման որակից, այն է՝ ընտրություններից, ես տեսնում եմ կապ: Հնարավորությունը` թողնել հին ընտրական կարգը, հնարավորություն է թողնել հին ռեյգինտային ընտրակարգով Հանրապետականի նախկին փողատերերին ճողոպրել խորհրդարան, իսկ ընդհանուր ցուցակով ապահովել ՀՀԿ մի քանի հոգանոց այն կերպարներին, որոնք իբր կապ չունեն ռեյտինգային համակարգի հետ: Խոսքն այստեղ փոքր կուսակցությունների կամ անցողիկ շեմի մասին չէ, խոսքը գնում է այն մասին, որ հին ընտրական օրենսգիրքը հնարավորություն է ՀՀԿ ներկայությունը նորից ու մեծ թվով խորհրդարանում ապահովելու համար: Գործադիր իշխանությանը և ՔՊ-ին դիմելով ես կոչ եմ անում միջոցներ ձեռնարկել: Եկեք նորից հանեք ժողովրդին, ճնշում գործադրենք, որ էստեղ խալտուրաներով չկարողանան պահել հին ընտրական օրենսգիրքը», ասել է պատգամավոր Տիգրան Ուրիխանյանը:
Տիգրան Ուրիխանյանի խոսքով, նոր օրենսգրքի չընդունման պատճառն այն է, որ գործադիրի առաջ երդում տված ՀՀԿ պատգմավորները չէին եկել, որ քվեարկեն: