Հանրապետականները գրոհում են.հարցականի տակ է մնում արտահերթ նիստի դրական վերջաբանը
ՀՀԿ-ն դեռ հույսը չի կորցրել և փորձում է միջազգային կառույցների ժխտողական դիրքորոշման միջոցով խափանել Ընտրական օրենսգրքում փոփոխությունների ամրագրումը։ Այս մասին է վկայում ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանի վերջին ելույթը Եվրախորհրդում, որը Հայաստան-ԵՄ նոր համաձայնագրի մասին էր՝ ներառյալ Ընտրական օրենսգրքում փոփոխությունների մասին «հավելվածը»։Օգտվելով ընձեռված ելույթի հնարավորությունից՝ Աշոտյանը, ըստ էության, ՀՀԿ դիրքորոշումն է արտահայտել նոր Ընտրական օրենսգրքի նախագծի վերաբերյալ, որ բարձրաձայնել էր կուսակցությունը արտահերթ նիստը ձախողելուց առաջ։ Հնչեցված դժգոհություններում նշվում է, որ ԸՕ-ը մշակվել է առանց խորհրդարանական ուժերի ներգրավվման, չի ենթարկվել Վենետիկի հանձնաժողովի փորձաքննության, և Վենետիկի հանձնաժողովի նախագահը չի ողջունում ԸՕ էական փոփոխությունները ընտրությունների նախաշեմին։
Աշոտյանը ասել է, որ պատգամավորների վրա ճնշումներ են գործադրել բարեփոխված ԸՕ-ն անցկացնելու համար, ինչի հետ կարող են շատերը չհամաձայնել մի պարզ պատճառով՝ եթե ճնշումներ են եղել իշխանությունների կողմից, ապա ինչու արտահերթ նիստը տապալվեց։ Իսկ եթե գործել է պարտադրանքի մեթոդը, ապա ինչու են մեկ անգամ ձախողելուց հետո ԸՕ փաթեթը նորից օրակարգ մտցնում։
Իսկ ելույթի ավարտին Աշոտյանը շեշտել է, որ քաղաքական ուժերի մեջ կոնսենսուս չկա և չի լինելու։ Քաղաքական ուժեր ասելով՝ Արմեն Աշոտյանը երևի նկատի է ունեցել մի կողմում ՀՀԿ-ին հավատարիմ մնացած պատգամավորներին և մյուս կողմում՝ խորհրդարանի մնացյալ ուժերին, քանի որ վերջինները հավատացնում են, որ, թեպետ կան անհամաձայնություններ և առաջին քվեարկության տապալման մեջ նաև իրենց մեղքի բաժինը կա, սակայն կողմ են նոր օրենսգրքի ընդունմանը։ Աշոտյանի վերջին պնդումից պարզ է դառնում, որ երկուշաբթի նախատեսվող արտահերթ նիստը նոր ԸՕ-ի հետ կապված, խմբակցությունը կրկին կբոյկոտի և դեռ հարցականի տակ է մնում արտահերթ նիստի դրական վերջաբանը:
