Որ հիվանդությունն ինչպես կարող է ազդել ծառայության զորակոչվելու և ծառայության մեջ գտնվող զինվորի ծառայության վրա
Dialogue.am կայքը «Սոցիալական իրավունք» խորագրի շրջանակներում ներկայացրել է պարտադիր ժամկետային զինծառայության անցնող և սահմանափակումով ծառայող զորակոչիկների հիվանդությունների ցանկն ու ծառայության սահմանափակումները:Ներկայացվել է, թե ներքին օրգանների` (սիրտ, որովայն, ներզատիչ համակարգ ..) որ հիվանդությունների դեպքում զինակոչիկը կզորակոչվի ծառայության, բայց կծառայի սահմանափակումով և որոնց դեպքում այնուամենայնիվ կանցնի ծառայության մյուս զորակոիչկների հետ հավասար պայմաններում:
Հրապարակման մեջ հիվանդությունները ներկայացված են առանձին-առանձին, ինչպես նաև նշված են, թե որ հիվանդությունն ինչպես կարող է ազդել ծառայության զորակոչվելու և արդեն իսկ ծառայության մեջ գտնվող զինվորի ծառայության վրա:
Սուր վարակիչ հիվանդություններ տարած, առողջացած զինակոչիկները` առանց կլինիկալաբորատոր շեղումների, ճանաչվում են պիտանի զինվորական ծառայության:
Եթե նորակոչիկի մոտ առկա է ներզատիչ համակարգի և նյութափոխանակության հիվանդություններ՝ ֆունկցիաների աննշան (այս ձևակերպումն ունի սահմանված մի քանի մակարդակ, որը ֆիքսված է համապատասխան որոշմամբ) խանգարումով, ապա նա պիտանի է զինծառայության, բայց սահմանափակումով:
Էնդոկրին հիվանդություններ տարած զինակոչիկների պիտանելիության հարցը որոշվում է անհրաժեշտ լաբորատոր հետազոտությունից հետո: Նրանց արգելվում է միջին և մեծ ֆիզիկական ծանրաբեռնումը, ծառայությունն օդադեսանտային զորքերում:
Եթե զորակոչիկի մոտ եղել են արյան համակարգի՝ ստացիոնար բուժում չպահանջող սուր հիվանդություններ, սակայն կլինիկալաբորատոր բուժումից հետո լավացել են, ու դա վկայում են հետազոտությունների փաստագրված արդյուքները, ապա նա պիտանի է զինծառայության՝ սահմանափակումով: Առանց որևէ հետևանքի սուր ճառագայթային հիվանդություն տարած անձինք, պիտանի են ճանաչվում զինծառայության համար:
Նորակոչիկը պիտանի է համարվում նաև այն դեպքում, երբ նրա մոտ անհայտ պատճառներից սուր ալերգիկ երևույթները 1տարվա ընթացքում ի հայտ են եկել 2-3 անգամից ոչ ավելի, հեշտությամբ անցել են բուժման կուրսից հետո և չեն ուղեկցվել վերը նշված բարդություններով:
Եթե նորակոչիկի մոտ առկա է եղել տուբերկուլյոզ, բայց բուժվել է ` առանց ֆունկցիայի խանգարման, ապա նա պիտանի է զինվորական ծառայության սահմանափակումով:
Նորակոչիկը պիտանի է զինծառայության սահմանափակումով, եթե նրա մոտ առկա է բրոնխաթոքային համակարգի և պլևրայի ոչ տուբերկուլոզային բնույթի քրոնիկ հիվանդություններ` ԱՇՖ-ի աննշան խանգարումներով, առանց աշխատունակության կորստի:
Քրոնիկ թարախային օբստրուկտիվ բրոնխիտներով անձանց պիտանելությունը որոշվում է ռեմիսիայի փուլում (նահանջի)` ըստ ԱՇՖ խանգարման (արտաքին շնչառական ֆունկցիա):
Եթ նորակոչիկի մոտ առկա է բրոնխիալ ասթմայի նոպաների բացակայություն վերջին 3 և ավելի տարիների ընթացքում, առանց բրոնխալայնիչների, ապա նա պիտանի է զինծառայության՝ սահմանափակումով:
Եթե նորակոչիկի մոտ առկա է սիրտանոթային համակարգի հիվանդություններ, որոնք ունեն բարեհաջող ելք և չեն ուղեկցվում հեմոդինամիկ խանգարումներով, ապա նա պիտանի է զինծառայության:
Եթե նորակոչիկի մոտ առկա է սրտի փականների իզոլացված, ոչ մեծ չափսերի (մինչև առաջին աստիճանը ներառյալ) արտանկումներ` աննշան հետհոսքով (մինչև առաջին աստիճանը ներառյալ), ապա այս դեպքում ևս նա պիտանի է զինծառայության:
Մինչև 3 մմ միտրալ փականի պրոլապս ունեցող անձինք ճանաչվում են պիտանի զինվորական ծառայության:
Զորակոչիկը պիտանի է զինծառայության նաև այն դեպքում, երբ նրա մոտ առկա է ոչ հաճախակի մոնոմորֆ փորոքային (ժամում` 10-ից պակաս, 24 ժամում` 200-ից պակաս) և վերփորոքային (ժամում` 20-ից պակաս, 24 ժամում` 400-ից պակաս) էքստրասիստոլիաները: Այս դեպքում անհրաժեշտ է աահմանափակել նրա ֆիզիկական ծանրաբեռնվածությունը:
