Փաշինյանի ու Ալիևի բանակցությունների մանրամասները ամբողջությամբ չի կարելի ներկայացնել՝ էթիկայի կանոններից ելնելով
Հայաստանի Հանրապետության վարչապետ Նիկոլ Փաշինյանը Մոսկվայում Եվրասիական տնտեսական հանձնաժողովի նիստում ելույթ ունենալուց հետո մասնակցել է տարբեր լրատվամիջոցների ներկայացուցիչների հետ մամուլիսի ասուլիսին:«ՌԻԱ Նովոստի» գործակալության լրագրողը հետաքրքրվել է՝ արդյոք Փաշինյանն Ադրբեջանի նախագահ Իլհամ Ալիևի հետ դավոսյան հանդիպման շրջանակում քննարկել է Արցախը բանակցային սեղանի շուրջ վերադարձնելու հարցը:
«Այն բոլոր հարցերը, հանրային հայտարարությունները, որոնք ես արել եմ, քննարկվել են մեր հանդիպման ընթացքում: Ես բազմիցս ասել եմ, որ բանակցային գործընթացում ներկայացնում եմ ՀՀ-ն: Մի պարզ պատճառով չեմ կարող ներկայացնել Արցախը, քանի որ այնտեղի քաղաքացիներն ինձ վարչապետ չեն ընտրել, նրանք ունեն իրենց կառավարությունը: Ես չեմ կարող ԼՂ անունից բանակցել: Դա բոլորին է հասկանալի»,-ասել է Փաշինյանը:
Նա նկատել է, որ բոլորին էլ հետաքրքրում են իր ու Ալիևի բանակցությունների մանրամասները, սակայն դրանք ամբողջությամբ չի կարելի ներկայացնել՝ էթիկայի կանոններից ելնելով:
«Այնուհանդերձ՝ բոլորը, ընդհանուր առմամբ, գիտեն՝ ինչ ենք խոսել: Բանակցություններն ընթացել են այն շրջանակում, որը համապատասխանում է իմ հրապարակային հայտարարություններին: Դեռևս նոր բան չկա»,-եզրափակել է վարչապետը:
Հիշեցնենք, որ ՀՀ վարչապետ Նիկոլ Փաշինյանը բազմիցս հայտարարել է, որ Արցախը պետք է բանակցային գործընթացի մաս կազմի։
