«Արմավիր» ՔԿՀ-ում կրկին դատապարտյալ է մահացել
Կեսգիշերին մոտ ՀՀ Արդարադատության նախարարության «Արմավիր» քրեակատարողական հիմնարկում դատապարտյալ է մահացել։ 61-ամյա Արամ Ա.-ի ինքնազգացողությունը առավոտյան վատացել էր, սակայն նա հրաժարվել էր շտապ օգնություն կանչելուց։ Ի դեպ, քրեական աշխարհում մահացողը հայտնի է «Կիլիկիացի Արամ» մականունով: Ըստ մեր աղբյուրի՝ երբ երկրորդ անգամ իրեն վատ է զգացել, ՔԿՀ-ի բուժակն ու պատասխանատուները շտապ օգնություն են կանչել։Բայց դատապարտյալի կյանքը փրկել չի հաջողվել:
Որոշ տեղեկությունների համաձայն՝ մահացողը թոքերի հետ կապված խնդիր ուներ, իսկ վերջին օրերին նրա մոտ թոքաբորբ էր հայտնաբերվել։ Մի ուշագրավ փաստ էլ. դատապարտյալը պատիժը կրում էր ՔԿՀ-ի 2-րդ մասնաշենքում, ուր ընդամենը մեկ շաբաթ առաջ՝ հունվարի 20-ին հանկարծամահ էր եղել դատապարտյալ Սահակ Սահակյանը։
