Մանվել Գրիգորյանը դատի է տվել գործարար Սիլվա Համբարձումյանին. պատիվ է պահանջում
ՀՀ ԱԺ նախկին պատգամավոր, գեներալ Մանվել Գրիգորյանը դատի է տվել գործարար Սիլվա Համբարձումյանին: Այս մասին տեղեկանում ենք դատական տեղեկատվական համակարգից։Մանվել Գրիգորյանը Սիլվա Համբարձումյանից պահանջում է պատվին, արժանապատվությանը պատճառված վնասի հատուցում: Հայցադիմումը դատարան է ներկայացվել հունվարի 29-ին. գործը մակագրվել է Երեւան քաղաքի ընդհանուր իրավասության դատարանի դատավոր Գայանե Խաչատրյանին:
Այսօր լրագրողների հետ զրույցում Մանվել Գրիգորյանի փաստաբաններից Լեւոն Բաղդասարյանն ասաց, որ հայցի համար հիմք է հանդիսացել Գրիգորյանի հասցեին որոշ ժամանակ առաջ Սիլվա Համբարձումյանի կողմից արված հայտարարություններից մեկը։
«Սիլվա Համբարձումյանը հայտարարել էր, որ անչափահասների հետ կապված խնդիր է ծագել եւ Մանվել Գրիգորանը հանցագործություն է կատարել։ Դա լկտի սուտ է եւ դրա համար համապատասխան հայց է ներկայացվել դատարան»,–ասաց նա՝ հավելելով, որ պատասխանողից նյութական փոխհատուցում չեն պահանջել։
Նշենք, որ Համբարձումյանը լատվամիջոցներից մեկին տված հարցազրույցում հայտարարել էր՝ «Մանվելը էրեխեք է բռնաբարել»: Գործարարը նշել էր, որ իր ասածի վերաբերյալ փաստեր ունի:
Ավելի վաղ Գրիգորյանը քաղաքացիական հայց էր ներկայացրել ընդդեմ «Մաքսինֆո» լրատվական կայքի՝ իր պատվին, արժանապատվությանը պատճառված վնասի հատուցման պահանջով:
Հայցադումում ներկայացնելու պատճառը «Մաքսինֆո» կայքում հրապարակված՝ «Առեւտուր թուրքերի հետ․Մանվել Գրիգորյանի մասին եւս մեկ աղմկահարույց բացահայտում» վերնագրով նյութն է, որում նշված է եղել, որ Մանվել Գրիգորյանը ժամանակին թուրքերին է վաճառել Վազգեն Սարգսյանի կողմից իրեն հանձված 1500 գլուխ ոչխար:
Գրիգորյանը լրատվամիջոցից, որպես փոխհատուցում պահանջել է 3 մլն դրամ։
