Քաղաքական հեղափոխության համար պետք է դուխ, իսկ տնտեսականի համար՝փող, որն այս ծրագրում չկա,եթե չփոխվի, կողմ քվեարկել չենք կարող
Քաղաքական հեղափոխության համար անհրաժեշտ է, որ ժողովուրդն ունենա դուխ եւ կամք, իսկ տնտեսական հեղափոխության համար հարկավոր է փող, դրա աղբյուրն ու ժամկետը, որը բացակայում է կառավարության ծրագրում: Այս մասին, այսօր՝ փետրվարի 12-ին, ԱԺ-ում լրագրողների հետ զրույցում նշեց ԲՀԿ խմբակցության ղեկավար Գագիկ Ծառուկյանը՝ անդրադառնալով կառավարության ներկայացրած ծրագրին:«Չեմ թաքցնում, կա 2-3 դրույթ, որի իրականացման դեպքում ժողովուրդը կզգա դրական փոփոխություններ իրենց կյանքում»,- ասաց նա։Անդրադառնալով ներդրումների խնդրին, Ծառուկյանն ասաց, որ անհրաժեշտ է գումարներ դնել տնտեսության մեջ, առանց գումարների տնտեսական աճ, զարգացում չի կարող լինել. «Ներդրումը անում է անհատ մարդը՝ իր բիզնեսը զարգացնելու համար: Որ գրված է, որ ներդրումներով պետք է 15-20 տոկոս աճ լինի, հենց այնպես ներդրում չի կարող լինել: Մենք չենք գնալու մարդկանց խնդրենք, որ ներդրում անեն: Ներդրման համար պետք է օրենքներ փոխվեն, պայմաններ ստեղծվեն, ամբողջ աշխարհում հրապարակվի, որ ՀՀ նոր կառավարությունը ներկայացնում է այսպիսի ծրագրեր, այսպիսի հնարավորություններ, արտոնություններ, նպաստավոր պայմաններ ներդրողների համար: Ներդրողները պետք է նայեն համեմատեն, թե աշխարհի ուրիշ երկրներում ինչ պայմաններ են, մեր պայմանները պետք է ավելի լավը լինեն, շահույթն ավելի մեծ լինի, որ ցանկություն ունենան գալու: Կառավարությունն էլ պետք է որոշի, թե ներդրողներից ով է ավելի կայացած»:
