Դուրս կգանք փողոց, վարչապետն է մեզ մեր իրավունքները փողոցում պաշտպանելու ձևը սովորեցրել.«Իրավունք»
««Իրավունքի» տեղեկություններով՝ ԱԺ փոխխոսնակ Ալեն Սիմոնյանի հեղինակած «Վիճակախաղերի մասին» ՀՀ օրենքում լրացումներ կատարելու մասին ՀՀ օրենքի նախագիծը (որով սահմանվում է, որ անմիջականորեն (խաղասրահի միջոցով) տոտալիզատոր և ավտոմատացված սարքավորումների միջոցով, վիճակախաղ կարող է կազմակերպվել միայն Ծաղկաձոր, Սևան, Ջերմուկ, Մեղրի քաղաքներում), ամենևին էլ պատահական չէ: Ըստ շրջանառվող լուրերի՝ պարոն Սիմոնյանը իր այս նախագծով փորձում է հետագայում ճանապարհ հարթել հեղափոխության օրերին քայլած որոշ գործարարների դաշտ մտցնելու համար:Հիշեցնենք, որ վերոհիշյալ օրենքի նախագիծը կյանքի կոչվելուց հետո հարյուրավոր քաղաքացիներ, ովքեր այսօր աշխատում են տարբեր նմանատիպ կենտրոններում, կանգնելու են գործազրկության առաջ:
Եվ ահա, ըստ աղբյուրի, նման վիճակախաղի կետերում աշխատող անձինք սպասում են կառավարության դիրքորոշմանը. «Եթե կառավարությունը որոշի, որ պետք է Ալեն Սիմոնյանի նախագիծը հավանության արժանանա, ուրեմն նշանակում է, որ մենք կմնանք գործազուրկ: Այդ դեպքում մենք դուրս ենք գալու փողոց ու մեր բողոքի ձայնը բարձրացնելու ենք: Հենց վարչապետն է մեզ մեր իրավունքները փողոցում պաշտպանելու ձևը սովորեցրել»,- մեզ հետ զրույցում ասաց խմբագրություն ահազանգած քաղաքացին»,-գրում է թերթը:
Նյութն ամբողջությամբ կարդացեք թերթի այսօրվա համարում:
