Արցախի և Ֆրանսիայի քաղաքների միջև կնքված բարեկամության հռչակագրերը չեղարկվել են. ՀՀ-ում Ֆրանսիայի դեսպանատունը չի մեկնաբանում, թե ինչու
Հայաստանում Ֆրանսիայի դեսպանատունը չի մեկնաբանում, թե ինչու են չեղարկվել Արցախի և Ֆրանսիայի քաղաքների միջև կնքված բարեկամության հռչակագրերը:Այս մասին հայտնեցին դեսպանատնից և նշեցին, որ իրենց կառույցն իրավասու է միայն Հայաստանի Հանրապետության մասով և չի մեկնաբանում արդարադատության որոշումները:
Ավելի վաղ հայտնի էր դարձել, որ հունիսի 11-ին Ֆրանսիայի Վալանս, Բուրգ լե Վալանս և Բուրգ դը Պեաժ քաղաքների իրավաբանական վարչությունները ծանուցում են ստացել առ այն, որ Գրենոբլի վարչական դատարանը չեղյալ է հայտարարել Դրոմի դեպարտամենտ-Արցախ, Վալանս-Ստեփանակերտ, Բուրգ լե Վալանս-Շուշի, Բուրգ դը Պեաժ-Մարտունի համայնքների միջև կնքված Բարեկամության հռչակագրերը:
Նշենք նաև, որ Վալանսի քաղաքապետ Նիկոլա Դարագոն այս առիթով հայտարարություն էր տարածել, որով հայտնել էր, որ Ֆրանսիայի և Արցախի համայնքների միջև կնքված Բարեկամության հռչակագրերի դեմ դատական գործերը չեն ազդի այն բարեկամության վրա, որ երկու ժողովուրդները տածում են միմյանց նկատմամբ և որը արտահայտվում է հռչակագրերի տեքստերով:
«Ի հեճուկս ճնշումների, որոնք բոլորս տեղյակ ենք, որ գալիս են արտերկրից՝ ես կրկին հաստատում եմ իմ աջակցությունը Արցախին, ազատ պայմաններում ընտրված նրա իշխանություններին և ինքնորոշման ուղեգծին»,-ասել էր Վալանսի քաղաքապետը:
