25-ամյա երիտասարդն առևանգել է 24-ամյա աղջկան, ձեռքերով և ոտքերով բազմաթիվ հարվածներ է հասցրել          Հայասատանն ունի՞ տարածքային պահանջներ.ՀՀ պետական զինանշանի վրա Արարատ սարն է, որի նկատմամբ հայերը հավակնություններ ունեն       Ադրբեջանցիների՝ Արցախի որոշ գյուղեր մտնելու, բնակիչների՝ սեփական ուժերով նրանց հակազդելու լուրերը սուտ են. ԱՀ ԱԱԾ    

06 հուն 2020 18:03

Վստահ եմ, որ 2020թ-ը լավ տարի է լինելու

 
Վստահ եմ, որ 2020թ-ը լավ տարի է լինելու
Hayacq.com-ի ամանորյա բլից-հարցազրույցը ԱԺ պատգամավոր Ալեքսանդր Ավետիսյանի հետ:
 
-Եթե 2019թ-ն ամփոփելու լինենք, ինչպիսի՞ն էր այն Ալեքսանդր Ավետիսյանի համար:
 
-2019 թվականն իրականում առանձնահատուկ էր ինձ համար և նախորդ բոլոր տարիներից տարբերվող: 
Պետք է խոստովանեմ, որ բավականին դժվարությամբ ադապտացվեցի Ազգային Ժողովի պատգամավորի կարգավիճակին: 
 
-Գլխավոր ձեռքբերումները որո՞նք են եղել:
 
-Տարվա գլխավոր իրադարձությունն ինձ համար որդուս՝ Նարեկի ծնունդն էր: Երբեմն կատակով ասում եմ, որ իրական հեղափոխությունն իմ կյանքում ոչ թե 2018-ի ապրիլին է տեղի ունեցել, այլ՝ 2019-ի: 
 
-Բացթողումների մասին ի՞նչ կասեք:
 
-Դժվարանում եմ նշել որևէ կոնկրետ բացթողում, սակայն ասեմ, որ ցանկացած գործունեության մեջ չեն կարող չլինել թե՛ բացթողումներ, թե՛ սխալներ և թերացումներ: 
Քաղաքացիական պայմանագիր կուսակցությունը, Իմ Քայլը դաշինքը փորձում են հավատարիմ մնալ իրենց ծրագրային դրույթներին և նախընտրական խոստումներին: Վստահաբար կարող եմ պնդել, որ ձեռքբերումները բազմապատիկ ավելին են քան բացթողումները:
 
-Իսկ որո՞նք են 2020թ-ի սպասելիքները, ակնկալիքները:
 
-2019-ը ինչ-որ առումով անցումային եմ համարում և իմ կարծիքով, բոլոր նախադրյալները կան, որ 2020 թվականը լինի ավելի հաջողված և արդյունավետ: 
Հատկապես մեծ են սպասելիքներս տնտեսական ցուցանիշների մասով: Ներքին վստահություն ունեմ, որ կհաջողվի գերակատարել բյուջեում ամրագրված ցուցանիշները: 
 
-Որտե՞ղ և ինչպե՞ս եք սիրում դիմավորել Ամանորը:
 
-Ամանորը սիրում եմ դիմավորել իմ հայրական տանը, ընտանիքիս, ծնողներիս հետ և այդ ավանդույթը շատ հազվադեպ է խախտվում: 
 
-Ձեր նախընտրած ամանորյա ուտեստը:
 
-Ամանորի գիշերը, առաջին շնորհավորանքներից հետո, պարտադիր պետք է խոզի բուդ համտեսեմ: Շատ եմ սիրում նաև ծնողներիս պատրաստած գոզինախը:
 
-Սիրո՞ւմ եք պատրաստել խոհանոցում և ի՞նչն է շատ լավ ստացվում:
 
-Խոհանոցում հազվադեպ եմ պատրաստում: Երբեմն ինչ-որ ապուր կարող եմ եփել՝ օգտագործելով ձեռքի տակ եղածը, սակայն որպես կանոն, այն ինչ ստացվում է ուտում եմ միայն ես: 
 
-Կարո՞ղ եք հիշել որևէ արտառոց երևույթ Ամանորի հետ կապված:
 
-Հիշում եմ 1991 թվականի Ամանորը: Մեկնել էի իմ ծննդավայր, Վրաստանի Բոլնիս-Խաչեն գյուղ, նոր տարին պապիկիս և տատիկիս հետ նշելու: Բնակավայրը ամբողջովին հոսանքազրկված էր, մարդիկ խումբ-խումբ հավաքվում էին գյուղի տարբեր հատվածներում, մեծ խարույկներ վառում և այդ պայմաններում դիմավորում նոր տարին: Հրավառությանն էլ փոխարինում էին ամենատարբեր զենքերից հնչող կրակոցները: Պապիկիս թույլտվությամբ մի կրակոց էլ ես արձակեցի նրա հրացանով:  
 
-Ամանորյա երազանքներ պահո՞ւմ եք, հավատո՞ւմ եք հրաշքների:
 
-Հրաշքների արդեն հավատում եմ: Երբ հագեցած աշխատանքային օրվա ավարտին գնում եմ տուն և ինձ դիմավորում է իմ հրաշք որդին իր հրաշք ժպիտով, ինչպե՞ս չհավատամ:
 
-Եթե հնարավորություն լիներ ետ տալ ժամանակը, ի՞նչ կփոխեիք Ձեր կյանքում:
 
-Ես հեշտ կյանքով չեմ ապրել: Հաղթահարել եմ շատ դժվարություններ, շատ փորձություններով եմ անցել, սակայն ոչինչ չէի փոխի, եթե լիներ այդ հնարավորությունը: 
 
-Ձեր ամանորյա մաղթանքը:

-Մաղթում եմ, որ խաղաղություն լինի և սահմանը պահող մեր յուրաքանչյուր զինվոր, հայրենիքի հանդեպ իր պարտքը կատարելով, ողջ առողջ միանա իր ընտանիքին: Առողջություն, սեր, միաբանություն եմ մաղթում բոլորիս, վստահ եմ, որ 2020-ը լավ տարի է լինելու:
Hayacq.com

Մեկնաբանություններ

Համընկնող լուրեր